Xiaomi компанияси смартфонлар етказиб бериш борасида биринчи бор Apple’ни ортда қолдириб, 2021 йилнинг иккинчи чорак якунлари бўйича бозорда иккинчи ўринни эгаллади. Бу ҳақда Canalys таҳлилчиларининг ҳисоботига таяниб, «Korrespondent.net» хабар берди.
Мазкур рейтингга Samsung етакчилик қилган — бозорнинг 19 фоиз улуши. Xiaomi’да эса ушбу кўрсаткич 17 фоизни ташкил этган. Учинчи ўринга тушиб кетган Apple’нинг иккинчи чоракдаги кўрсаткичлари 14 фоизга етди.
Шунингдек, кучли бешликдан Хитойнинг BBK Electronics концерни таркибига кирувчи Oppo ва Vivo брендлари ҳам ўрин олган — уларнинг улуши 10 фоиздан.
Таҳлилчиларнинг таъкидлашича, 2021 йилнинг иккинчи чорагида жаҳон смартфонлар бозорининг ҳажми 12 фоизга ўсган. Бу истеъмолчиларнинг коронавирус пандемияси сабаб юзага келган шокдан нормал ҳаёт тарзига қайтаётгани билан изоҳланмоқда.
Айниқса Xiaomi ўз бизнесини фаол ривожлантирмоқда. Компаниянинг Жанубий Америкага смартфонлар етказиб бериши 300 фоизга, Африкага — 150 фоизга, Ғарбий Европага — 50 фоизга ошган.
Эслатиб ўтамиз, 2021 йилнинг дастлабки уч ойи ичида ҳам бутун дунё бўйлаб Жанубий Кореянинг Samsung компанияси энг кўп смартфон сотишга муваффақ бўлган эди.
Изоҳ (0)