Xiaomi kompaniyasi smartfonlar yetkazib berish borasida birinchi bor Apple’ni ortda qoldirib, 2021-yilning ikkinchi chorak yakunlari bo‘yicha bozorda ikkinchi o‘rinni egalladi. Bu haqda Canalys tahlilchilarining hisobotiga tayanib, “Korrespondent.net” xabar berdi.
Mazkur reytingga Samsung yetakchilik qilgan — bozorning 19 foiz ulushi. Xiaomi’da esa ushbu ko‘rsatkich 17 foizni tashkil etgan. Uchinchi o‘ringa tushib ketgan Apple’ning ikkinchi chorakdagi ko‘rsatkichlari 14 foizga yetdi.
Shuningdek, kuchli beshlikdan Xitoyning BBK Electronics konserni tarkibiga kiruvchi Oppo va Vivo brendlari ham o‘rin olgan — ularning ulushi 10 foizdan.
Tahlilchilarning ta’kidlashicha, 2021-yilning ikkinchi choragida jahon smartfonlar bozorining hajmi 12 foizga o‘sgan. Bu iste’molchilarning koronavirus pandemiyasi sabab yuzaga kelgan shokdan normal hayot tarziga qaytayotgani bilan izohlanmoqda.
Ayniqsa Xiaomi o‘z biznesini faol rivojlantirmoqda. Kompaniyaning Janubiy Amerikaga smartfonlar yetkazib berishi 300 foizga, Afrikaga — 150 foizga, G‘arbiy Yevropaga — 50 foizga oshgan.
Eslatib o‘tamiz, 2021-yilning dastlabki uch oyi ichida ham butun dunyo bo‘ylab Janubiy Koreyaning Samsung kompaniyasi eng ko‘p smartfon sotishga muvaffaq bo‘lgan edi.
Izoh (0)