Президент Шавкат Мирзиёев 16 июль куни Тошкентдаги халқаро конференция доирасида АҚШ президенти маслаҳатчиси Элизабет Шервуд-Рендалл бошчилигидаги делегацияни қабул қилди, деб хабар бермоқда давлат раҳбари матбуот хизмати.
Хабарда айтилишича, икки томонлама кун тартибининг долзарб жиҳатлари ва халқаро сиёсат масалалари кўриб чиқилди. Шавкат Мирзиёев кейинги йилларда Ўзбекистон—АҚШ стратегик шериклик ва кўп қиррали ҳамкорлик муносабатлари жадал суръат билан ривожланиб бораётганини мамнуният билан қайд этди.
Элизабет Шервуд-Рендалл Ўзбекистон Президентига АҚШ президенти Жозеф Байденнинг самимий саломи ва энг эзгу тилакларини етказди. Президентнинг Марказий ва Жанубий Осиё боғлиқлигини мустаҳкамлаш борасидаги ташаббуслари АҚШ маъмурияти томонидан юксак баҳоланаётганини таъкидлади.
Бундан ташқари, Ўзбекистоннинг суверенитети, мустақиллиги ва ҳудудий яхлитлиги, янги Ўзбекистонни барпо этиш бўйича олиб борилаётган ислоҳотлар, Марказий Осиёда ишонч, яхши қўшничилик ва шерикликни мустаҳкамлаш борасидаги саъй-ҳаракатлар қатъий қўллаб-қувватланди.
Учрашувда конструктив сиёсий мулоқотни давом эттириш масалалари, шунингдек, икки томонлама ҳамкорликни кенгайтиришнинг амалий жиҳатлари, шу жумладан, пандемияга қарши курашиш ва аҳолини эмлаш, АҚШнинг етакчи компания ва банклари иштирокида қўшма инвестиция лойиҳаларини илгари суриш муҳокама қилинди.
Афғонистонда юзага келган вазият юзасидан батафсил фикр алмашилди.
Эслатиб ўтамиз, Тошкент шаҳрида 16 июль куни Шавкат Мирзиёев ташаббуси билан ташкил этилган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференцияда Афғонистон президенти, Покистон бош вазири, Марказий ва Жанубий Осиё давлатларининг ташқи ишлар вазирлари, жами 44 та мамлакат ва 30 га яқин халқаро ташкилот делегациялари, нуфузли хорижий илмий-тадқиқот ва таҳлил марказлари раҳбарлари иштирок этди.
Конференция доирасида Шавкат Мирзиёев Қирғизистон делегациясига раҳбарлик қилган иқтисодиёт ва молия вазирини, Хитой, Россия, Ҳиндистон, Қозоғистон, Туркманистон, Озарбайжон, Туркия, Саудия Арабистони, Кувайт ташқи ишлар вазирларини, қабул қилди. Давлат раҳбари, шунингдек, Афғонистон ҳамда Покистон бош вазири билан учрашди, Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррелни, БМТнинг Европа иқтисодий комиссияси раҳбари Олга Алгаеровани қабул қилди.
Изоҳ (0)