Prezident Shavkat Mirziyoyev 16-iyul kuni Toshkentdagi xalqaro konferensiya doirasida AQSh prezidenti maslahatchisi Elizabet Shervud-Rendall boshchiligidagi delegatsiyani qabul qildi, deb xabar bermoqda davlat rahbari matbuot xizmati.
Xabarda aytilishicha, ikki tomonlama kun tartibining dolzarb jihatlari va xalqaro siyosat masalalari ko‘rib chiqildi. Shavkat Mirziyoyev keyingi yillarda O‘zbekiston—AQSh strategik sheriklik va ko‘p qirrali hamkorlik munosabatlari jadal sur’at bilan rivojlanib borayotganini mamnuniyat bilan qayd etdi.
Elizabet Shervud-Rendall O‘zbekiston Prezidentiga AQSh prezidenti Jozef Baydenning samimiy salomi va eng ezgu tilaklarini yetkazdi. Prezidentning Markaziy va Janubiy Osiyo bog‘liqligini mustahkamlash borasidagi tashabbuslari AQSh ma’muriyati tomonidan yuksak baholanayotganini ta’kidladi.
Bundan tashqari, O‘zbekistonning suvereniteti, mustaqilligi va hududiy yaxlitligi, yangi O‘zbekistonni barpo etish bo‘yicha olib borilayotgan islohotlar, Markaziy Osiyoda ishonch, yaxshi qo‘shnichilik va sheriklikni mustahkamlash borasidagi sa’y-harakatlar qat’iy qo‘llab-quvvatlandi.
Uchrashuvda konstruktiv siyosiy muloqotni davom ettirish masalalari, shuningdek, ikki tomonlama hamkorlikni kengaytirishning amaliy jihatlari, shu jumladan, pandemiyaga qarshi kurashish va aholini emlash, AQShning yetakchi kompaniya va banklari ishtirokida qo‘shma investitsiya loyihalarini ilgari surish muhokama qilindi.
Afg‘onistonda yuzaga kelgan vaziyat yuzasidan batafsil fikr almashildi.
Eslatib o‘tamiz, Toshkent shahrida 16-iyul kuni Shavkat Mirziyoyev tashabbusi bilan tashkil etilgan “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyada Afg‘oniston prezidenti, Pokiston bosh vaziri, Markaziy va Janubiy Osiyo davlatlarining tashqi ishlar vazirlari, jami 44 ta mamlakat va 30 ga yaqin xalqaro tashkilot delegatsiyalari, nufuzli xorijiy ilmiy-tadqiqot va tahlil markazlari rahbarlari ishtirok etdi.
Konferensiya doirasida Shavkat Mirziyoyev Qirg‘iziston delegatsiyasiga rahbarlik qilgan iqtisodiyot va moliya vazirini, Xitoy, Rossiya, Hindiston, Qozog‘iston, Turkmaniston, Ozarbayjon, Turkiya, Saudiya Arabistoni, Kuvayt tashqi ishlar vazirlarini, qabul qildi. Davlat rahbari, shuningdek, Afg‘oniston hamda Pokiston bosh vaziri bilan uchrashdi, Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelni, BMTning Yevropa iqtisodiy komissiyasi rahbari Olga Algayerovani qabul qildi.
Izoh (0)