Ўзбекистон ва дунёнинг бошқа давлатлари аҳолиси ўртача иш ҳақига қанча бензин сотиб олиши мумкин?

Picodi.com таҳлил бўлими дунёнинг турли мамлакатларида ўртача иш ҳақига қанча литр бензин сотиб олиш мумкинлигини аниқлади, деб ёзмоқда Spot.

Бензин қимматламоқда

2021 йилнинг биринчи ярмида иқтисодиётнинг босқичма-босқич тикланиши ва бензин нархларининг 2020 йилнинг шу даврига нисбатан ўсиши қайд этилди. Нархларнинг кескин кўтарилиши Арманистон (+22,8 фоиз), Грузия (+17,4 фоиз), ва Украинада (+13,7 фоиз) кузатилди

• Ўзбекистонда ёқилғи нархи 7,7 фоизга, Қирғизистонда — 12,6 фоизга, Қозоғистонда — 6,7 фоизга, Россияда 5,5 фоизга ошди;
• Унинг нархи фақат Туркманистонда пастлади;
• Европа ва МДҲ давлатлари орасида энг арзон ёқилғи Қозоғистонда — литри 0,43 доллардан.

Ўртача иш ҳақига қанча бензин сотиб олиш мумкин?

Бу борада 2021 йилда Германия 1786 литр бензин билан етакчи бўлди. Иккинчи ўринни Швеция (1771 литр), учинчи ўринни эса Финляндия (1589 литр) эгаллади.

Россияда ўртача қатламдаги аҳоли иш ҳақига 938 литр бензин сотиб олиши мумкин (8-ўрин). Озарбайжонда ўртача ойликка 561 литр бензин сотиб олиш мумкин. Грузияда бундан 200 литр кам бензин сотиб олса бўлади — 359 литр (21-ўрин).

Ўзбекистонда эса ўртача маошга 317 литр бензин сотиб олиш мумкин, 2020 йилда 330 литр олиш мумкин эди.

Бензиннинг ўртача иш ҳақига нисбати бўйича рейтингнинг энг юқори ўринларини Форс кўрфази мамлакатлари эгаллади:

• Қатар — 6 532 литр;
• Саудия Арабистони — 5 170 литр;
• Кувайт — 5 158 литр.

Рейтингда охирги ўринни Куба эгаллади. У ерда ўртача иш ҳақига атиги 26 литр (2020 йилга нисбатан 2 литрга кам) бензин сотиб олиш мумкин. Тожикистон (188 литр) ва Замбияда (214 литр) бу кўрсаткич бирмунча яхшироқ.