«Андижон музқаймоғи»ни беш йилдан буён ишлаб чиқариш билан шуғулланиб келаётган тадбиркор Ҳикматилло Мадраҳимов бошқа янги бренд остида ишлашга қарор қилди, деб хабар беради Spot.
Адлия вазирлиги ҳузуридаги Интеллектуал мулк агентлигининг маълум қилишича, Мадраҳимов «Анжан музқаймоғи» товар белгисини рўйхатдан ўтказган бўлиб, эндиликда у ўз компаниясида ушбу номдан фойдаланади.
Таъкидланишича, «Андижон музқаймоғи» республиканинг барча ҳудудларига етиб борган ва ўзининг ноодатий таъми билан харидорларнинг ишончи ҳамда меҳрига сазовор бўлган. Аммо шу кунларда кўп жойларда «Андижон музқаймоғи»нинг сифатига мос келмаган контрафакт маҳсулот турлари кўпайиб, кўчаларда гўёки самолёт орқали Андижондан олиб келинган деган ёлғон маълумот билан сотилаётгани учрамоқда.
Аввалроқ тадбиркор музқаймоқ ишлаб чиқариш соҳасида 15 йилдан буён фаолият юритаётгани, беш йил олдин «Андижон музқаймоғи»ни чиқаришни бошлганини сўзлаб берганди. Мазкур ном оммалашгач, бундан фойдаланишга қарор қилган кўплаб инсонлар пайдо бўлган.
Ушбу ном остида сотилаётган музқаймоқлар санитария талабларига риоя қилмаётгани аниқлангач, Мадраҳимов ишлаб чиқаришни тўхтатган. Харидорлар ҳақиқий ва сохта музқаймоқни ажратиб олиши учун тадбиркор нафақат товар белгисини, балки фургонини ҳам рўйхатдан ўтказган.
Изоҳ (0)