Яқинда El Confidencial газетаси Флорентино Переснинг футболчилар ва мураббийлар ҳақидаги ҳақоратомуз гаплари ёзиб олинган аудиоёзувларни эълон қилди.
Португаллар ёқмайди: Роналду ва Моуриньо ақлдан озган, агент Мендеш — нолга тенг
Перес португалиялик футболчи ва мураббий ҳақида ғалати гаплар гапирди:«Роналду — ақлдан озган. У аҳмоқ, касал одам. Сиз уни соғлом деб ўйлайсиз, лекин у соғлом эмас, йўқса ҳозирги ишларини қилмасди.
Охирги қилган аҳмоқлигини бутун дунё кўрди. Нима деб ўйлайсиз, нега у бундай аҳмоқлик қилмоқда?»
Криштиану 2012 йил «Гранада»га қарши ўйинда урган голларини нишонламайди. Учрашувдан сўнг футболчи Мадрид жамоасида бахтсизлиги ва нега ўзини бундай ҳис қилаётганини «Реал» раҳбарияти яхши билишини айтганди. Флорентино айнан шу «аҳмоқлик» ҳақида гапирганди.
«Моуриньо ва Роналду — даҳшатли эго соҳиблари. Иккаласи ҳам ҳақиқатни кўрмаяпти. Улар бошқачароқ бўлганда янада кўпроқ пул ишлаб топарди. Иккита соғлом бўлмаган инсонлар. Биз катта пуллар ҳақида гапиряпмиз, ахир бу имиж масаласи. Уларда ҳеч кимга ёқмайдиган қиёфа бор. Бу антиреклама!»
«Мендеш умуман ҳеч нарсани, ҳаттоки, сирларни ҳам бўлишмайди. У нолга тенг. Интервьюда ҳам. Ҳеч нарсада. Улар (Роналду ва Моуриньо) Мендешга эътибор ҳам қаратмайди».
Касильяс ва Раулни «Реал» тарихидаги энг буюк қаллоблар деб ҳисоблайди
Флорентино жамоа афсонаси Икер Касильяс ҳақида ҳам фикр билдирган. Нега у билан муносиб хайрлашмагани энди аниқ бўлди:«Бечора Касильяс унчалик ақлли эмас. Уни жуда яхши биламан. Ёқтирган қизи билан муаммоси бўлса, ёш болалардек ўзини йўқотиб қўяди. У худди кучукчага ўхшайди, болаларча қилиқлари бор.
Касильясни ҳамма яхши кўради, бу ҳайратланарли. Қаранг: у улкан эмас ва кўзи яхши кўрмайди. Унинг агентига: ‘Дўстим, уни офталмологга олиб бор. Менимча, у узоқни кўра олмайди’, — дегандим.
Қасам ичаман, шундай дедим. Ахир, унинг фойдаси учун гапиргандим».
«Касильяс — «Реал»га муносиб дарвозабон эмас. Нима айтишимни хоҳлагандингиз? Касильяс ҳеч ким бўлмаган. Икер — бизнинг энг катта муваффақиятсизлигимиз. Нима бўлаётганини биласизми? Уни ҳурмат қилишади, яхши кўришади, у ҳақида гапиришади. Билмайман нега улар Касильясни бунча ҳимоя қилади».
Рауль нега Зиданнинг издоши бўлмагани аниқ бўлди — Перес уни ёқтирмайди:
«Бу катта қаллоблардан бири (Касильяс), иккинчиси — Рауль. «Реал» тарихидаги энг катта қаллоблар. Биринчиси — Рауль, иккинчиси — Касильяс», — El Confidencial тарқатган аудиоёзувлар шу гаплар жаранглайди.
Қизиқ, икки футболчи ҳам бир пайтлар жамоа сардорлари бўлган.
Дель Боскени аҳмоқ деди
«У мураббийликни билмайди, тактикани тушунмайди. У аҳмоқ. Ҳеч ким уни ишга олмайди, чунки унинг мураббий эмаслигини ҳамма билади (гаплар 2006 йилда дель Боске ишсиз вақтида ёзиб олинган). Дель Боске — ҳаётимдаги энг катта алдовдир.
«Бешиктош» президенти билан гаплашинг (дель Боске 2004/05 йилларда Туркия жамоасида ишлаган), у нима ҳис қилаётганини айтади. Дель Боске — мураббий эмас.
Фигу «Реал»га келди ва Раулнинг дўстига айланди. Улар Ерро билан биргаликда жамоани бошқарарди. Бечора Висенте, унинг жойи у ерда эмасди.
У терма жамоани бошқармоқчи? Терма жамоага дель Боске етишмай турганди ўзи».
Кейинчалик дель Боске Испания терма жамоаси билан ЖЧ—2010 ва Евро—2012 ни қўлга киритди.
Журналист «Реал»га шантаж уюштирган: аудиоёзувларни тарқатмаслик учун 10 миллион евро талаб қилган
Журналист Хосе Антонио Абеллан ўн йил олдин «Реал»га нисбатан шантаж уюштирганди. 2011 йилда у Мадрид ресторанларидан бирида «Реал» вице-президенти Эдуардо Фернандес де Бласомдан аудиоёзувларни ўчириб ташлаш эвазига 10 миллион евро беришни талаб қилади. Лекин клуб бунга рози бўлмайди.Ушбу ҳафтада эса аудиоёзувлар бирин-кетин El Confidencial газетасида чиқа бошлади.
Перес газетани судга бермоқчи, у аллақачон баёнот берди
Флорентино Перес ғурур ва қадр-қимматни ҳимоя қилиш учун газетани судга бермоқчи. У керакли ҳужжатларни юристларга тақдим қилди.
«Реал» эса Переснинг расмий баёнотини эълон қилди:
«Тарқатилган ёзувлар суҳбатнинг бир қисми эди. Улар Хосе Антонио Абеллан томонидан сирли равишда ёзиб олинган. У бир неча йил давомида аудиоёзувларни бизга сотмоқчи бўлди. Муддати ўтиб кетган бўлса ҳам El Confidencial газетаси уларни эълон қилди.
Улар контекстдан юлиб олинган. Шунча йилдан кейин аудиоёзувларнинг тарқалиши Суперлигани ташкил қилганим билан боғлиқ. Мен буни юристларга топширдим, улар вазиятни ўрганиб чиқмоқда, нима қилиш кераклигини улар ҳал қилади».
Изоҳ (0)