Сурхондарё вилояти Қизириқ туманида вояга етмаган болалар «КамАЗ» юк машинасини бошқаргани тўғрисида хабар берилганди. ИИВ ЙҲХББ ахборот хизматининг маълум қилишича, ушбу юк машинаси йигитлардан бирининг амакисига тегишли бўлган ва унга нисбатан қонуний чора кўрилган.
8 июль куни давлат рақами белгисиз «КамАЗ» русумли юк машинаси давлат аҳамиятига эга бўлган 4Р-103 автомобиль йўлининг Қизириқ туманидан ўтган 17-километрида тўхтатилганида уни мактаб ўқувчиси бошқариб кетаётгани аниқланган. «Ҳайдовчи» ўзини 13 ёш эканлиги, «КамАЗ»ни ҳайдашни билиши, ўзи Шерободдаги 72-мактаб ўқувчиси эканлиги, бу йил 6-синфга ўтиши, ҳозирда таътилда эканини айтган. Шунингдек, салонда унинг 16 ёшли шериги ҳам бор бўлган, улар биргаликда «КамАЗ»да Қизириқ туманига ғишт ташиб келган.
Йигитчанинг отаси сўзларига кўра, «КамАЗ» боланинг амакисига тегишли ва у юк машинаси қаровсиз қолганидан фойдаланиб, уни ўзбошимчалик билан миниб чиқиб кетган.
«Ички ишлар ходимлари биз билан профилактика суҳбат ўтказишди. Бундан кейин имкон қадар фарзандимни қаровсиз қолдирмаймиз», — дейди боланинг отаси.
«КамАЗ» эгасининг таъкидлашича эса ўша куни юк машинаси ғишт заводида бўлган ва йигитчанинг «КамАЗ»ни ҳайдаб чиқиб кетганидан хабардор бўлган.
«Озгина мазам йўқ эди, шунинг учун мажбур бўлдим», — дейди ҳайдовчи. Қайд этилишича, «КамАЗ» ҳайдовчисига нисбатан тегишли тартибда чора кўрилган.
Аввалроқ Сурхондарёда ҳайдовчилик гувоҳномаси бўлмаган йигит бошқарувидаги Nexia пастликка тушиб кетиши оқибатида машина ичида бўлган 17 ёшли қиз воқеа жойида вафот этгани тўғрисида хабар берилганди.
Изоҳ (0)