Россия ташқи ишлар вазири Сергей Лавров Москвада ўтказилган матбуот анжумани давомида Америка базаларининг Марказий Осиёда пайдо бўлиш эҳтимоллигига изоҳ берди.

Фото: Россия Ташқи ишлар вазирлиги матбуот хизмати

«Марказий Осиё давлатларининг режалари қандай эканлигини улардан (АҚШдан — таҳр.) сўраш керак эмас, буни минтақанинг тегишли давлатлари ҳал қилади. Эслатиб ўтамиз, Марказий Осиёдан ташқари, улар Покистонга ҳам мурожаат қилган. Покистон раҳбарияти бу каби вариантни ҳатто муҳокама қилмаётганликларини оммавий эълон қилди. Ўзбекистон ҳам шу каби баёнот берди», — дейди Лавров.

Россия ТИВ раҳбарининг сўзларига кўра, Марказий Осиёдан Қозоғистон, Тожикистон, Қирғизистон Коллектив хавфсизлик шартномаси ташкилотининг (КХШТ) аъзолари ҳисобланади. Шундай экан, хориж ҳарбийларининг КХШТ аъзолари ҳудудига жойлаштирилишига оид масала ташкилотнинг низомига биноан шу доирада келишиб олинади.

«Мен Марказий Осиёда Америка янги ҳарбий объектларининг пайдо бўлиши ушбу минтақадаги хавфсизлик манфаатларига жавоб беради, деб ўйламайман. Буни Марказий Осиёдан ҳеч ким ёрдам сўраб мурожаат қилмагани кўрсатиб турибди», — дейди у.

Лавровнинг қўшимча қилишича, Пентагондаги Америка раҳбарияти ўз ҳарбий ресурсларини Афғонистон атрофида жойлаштириш имкониятини зарурат туғилганида афғон ҳудудига зарба бериш учун хоҳламоқда.

«Америкаликлар НАТОнинг 100 мингдан ортиқ контингенти билан 20 йил мамлакат ичида бўлган ҳолда бирор нима қила олмаган бўлса, Афғонистон ташқарисида сезиларли даражада кам устунлик билан қандай натижаларга эришмоқчи? Ўйлайманки, бу ерда жавоб тушунарли.

Афтидан, гап ўз ҳарбийларининг Марказий Осиёда бўлишини таъминлаш ва шу орқали минтақадаги вазиятга таъсир кўрсатиш хоҳиши ҳақида кетмоқда», — дея қайд этади Лавров.

Аввалроқ Марказий Осиё ТИВ раҳбарлари Афғонистондаги вазиятни муҳокама қилгани, Шавкат Мирзиёев Владимир Путин билан Афғонистоннинг шимолий ҳудудларидаги вазиятни муҳокама қилгани ҳамда Шавкат Мирзиёев ва Эмомали Раҳмон Афғонистондаги кескинликнинг кучайиши билан боғлиқ вазиятни муҳокама қилгани ҳақида хабар берилганди.