Наманган вилоятининг Учқўрғон туманидаги хонадонлардан бирида оғирлиги 80 килограммдан юқори бўлиши кутилаётган ошқовоқлар етиштирилди. Бу ҳақда «Дарё» мухбири Азизбек Абдувалиев хабар бермоқда.
Ошқовоқларни Учқўрғон туманидаги «Пахтачи» маҳалласида истиқомат қилувчи 35 яшар Аҳрорбек Қўчқоров етиштирди. У тумандаги агрокорхоналардан бирида насос устаси бўлиб ишлайди. 16 сотихли ҳовлисида рўзғорга ярайдиган деярли барча мева-сабзавот ва полиз экинлари, жумладан, картошка-сабзи, қовун-тарвуз, ошқовоқ ва маккажўхори эккан.
«Россияда ишлайдиган бир танишим янгилик, экиб кўринг, деб 10 тача ошқовоқ уруғи олиб келганди. Экдим, ҳар тупида 3-4 тадан солди. Ҳали пишмай туриб, ҳамма ёққа овозаси кетди. Шу туришида 50 кило атрофида бор, яна бир-икки ойдан кейин 80 килограммдан ошади», — дейди Аҳрорбек.
Ҳозирда Учқўрғондаги гигант ошқовоқни кўриш ва унинг фонида суратга тушиш учун узоқ-яқиндан келаётганларнинг оқими тинмаяпти.
Изоҳ (0)