Тошкентда 73 ёшли эркакка куч ишлатган патруль-пост хизмати ходимларига суд ҳукми ўқилди. Бу ҳақда Тошкент шаҳар судлари хабар берди.
Маълумотларга кўра, мазкур ҳолат 2020 йилнинг декабрида содир бўлган. ППХ ходимлари пойтахтнинг Юнусобод туманида уч нафар эркакни тўхтатган. Фуқаролардан бири ходимлар билан можарога борган, шу сабабли уни куч ишлатиб, хизмат автомобилига ўтқазишга уринишган.
ППХ ходимлари кекса эркакни оёғидан тортиб, хизмат автомобилига чиқаришга урингани видеога тушиб қолган. Кўнгилсиз ҳодиса оқибатида эркак боши билан урилиб, жиддий жароҳат олган.
Суд ППХ ходимларини ушбу ҳолат бўйича Жиноят кодексининг 104 (қасддан баданга оғир шикаст етказиш) ва 206-моддасига (ҳокимият ёки мансаб ваколати доирасидан четга чиқиш) кўра айбли деб топди.
Уларга нисбатан 2 йил ички ишлар органларида хизмат қилиш ҳуқуқидан маҳрум этилиш ва 5 йил муддатга озодликдан чеклаш жазоси тайинланди.
Аввалроқ Наманган вилоят ИИБ Жиноят-қидирув бошқармасининг икки нафар катта тезкор вакили жиноий жавобгарликка тортилгани, Фарғонада Миллий гвардия ходими томонидан дубинка билан калтаклангани айтилган аёл иши судда кўриб чиқилгани, Қашқадарёда ҳайдовчига куч ишлатган транспорт бошқармаси ходими ишдан олингани тўғрисида хабар берилганди.
Изоҳ (0)