Самарқанд вилоятидан Қашқадарёнинг Чироқчи туманига келиб, туманнинг Шўрқудуқ қишлоғида иш бошлаган шифокорга президент қарорига кўра 30 миллион сўм рағбат пули тўлаб берилди. Бу ҳақда «Дарё»га вилоят Соғлиқни сақлаш бошқармаси ахборот хизмати раҳбари Нуриддин Эгамов хабар берди.
Таъкидланишича, самарқандлик ёш шифокор Ислом Ғаниев Чироқчи туманидаги Шўрқудуқ оилавий шифокорлик пунктида 2021 йилнинг февраль ойида иш бошлаган.
«Бошқарма бошлиғи Равшан Тулаковнинг шахсан ўзи шу ёш йигит билан суҳбатлашиб, унга вилоятда ишлаш таклифини берганди. Яхши маош, яшаш учун қулай шарт-шароит ва рағбат пули ваъда қилиб, унинг Чироқчи туманида иш бошлашига эришганди. Бугунги кунга келиб шифокор йигит Равшан Тулаковнинг таклифига хўп деганидан хурсанд. Унга нафақат яхши маош, кеча 30 миллион сўм рағбат пули ҳам тўлаб берилди», — дейди бошқарма ахборот хизмати раҳбари Нуриддин Эгамов.
Нуриддин Эгамовнинг қўшимча қилишича, вилоятда Ислом Ғаниевдан ташқари, яна тўрт нафар шифокорга 30 миллион сўмлик рағбат пули тўлаб берилган.
Маълумот берилишича, Қашқадарёга қўшни вилоят Самарқанднинг Паст Дарғом тумани «Гумбаз» маҳалласидан келиб ишлаётган Ислом Ғаниев айни кунда 28 ёшда. У 2019 йил Самарқанд тиббиёт институтини тамомлаган. Ёш оила соҳиби.
«Олис ҳудудда ишлаш бўйича шартномани вилоятимизда биринчилардан бўлиб имзолаган Ислом Шўрқудуқ оилавий шифокорлик пунктида 1,5 ставка оилавий шифокор ҳамда ҳудуддаги Тез тиббий ёрдам шохобчасида навбатчи шифокор сифатида ишламоқда. Унга бу рағбатлардан ташқари, ижара тўлови ҳам тўлаб берилмоқда. Ёш шифокор 30 миллион сўмни эскириб қолган Matiz машинаси ўрнига янги автомашина олишга сарфлаш ниятида эканлигини маълум қилди», — дейди Нуриддин Эгамов.
Қайд этилишича, вилоятда узоқ ҳудудлардан келиб меҳнат қилаётган шифокорлар сони саккиз нафарга етган.
Изоҳ (0)