Janubiy Koreya parlamenti key-pop yulduzlarining armiyada xizmat qilishini kechiktirish imkonini beradigan qonun loyihasini ma’qulladi, deb xabar beradi BBC.

Foto: Getty Images

Janubiy Koreyada 18 dan 28 yoshgacha bo‘lgan barcha yigitlarning armiyada xizmat qilishi majburiy hisoblanadi. Amaldagi qonunga ko‘ra, mashhur aktyorlar, sportchilar va klassik musiqachilarga muddatli harbiy xizmatni o‘tashni 30 yoshgacha kechiktirishga ruxsat berilgan.

Yangi o‘zgartirishga ko‘ra, endilikda “ommaviy madaniyat va san’atda muvaffaqiyatga erishgan” pop-ijrochilarga ham 30 yoshgacha armiyaga bormaslikka ruxsat etiladi. Bu kabi ruxsat madaniyat vazirining tavsiyasiga ko‘ra beriladi.

O‘zgartirishlar sabab BTS key-pop guruhi o‘z tarkibini yana ikki yilga saqlab qolishi mumkin. Guruh a’zolarining eng kattasi 4-dekabr kuni 28 yoshga to‘ladi; eski qoidalarga ko‘ra, u yil oxiriga qadar armiyaga borishga majbur edi — endilikda uni kechiktirishi mumkin.

Ma’lumot uchun, BTS guruhi sentabr oyida Amerikaning Billboard 100 chartida birinchi o‘rinni egallagan ilk key-pop loyiha hisoblanadi.

Eslatib o‘tamiz, shu yilning aprel oyida “Tottenhem” hujumchisi Son Hyon Min Janubiy Koreyada harbiy tayyorgarlikdan o‘tashi ma’lum bo‘lgandi. 2018-yilda Son Janubiy Koreya terma jamoasi bilan Osiyo o‘yinlarida g‘oliblikni qo‘lga kiritgan va buning evaziga harbiy xizmatdan ozod etilgandi. Biroq futbolchi qisqartirilgan harbiy tayyorgalik jarayonidan o‘tishi kerak edi.