Бурғиловчиларнинг меҳнати, уларнинг Ўзбекистон иқтисодиёти, мамлакат тараққиёти ва фаровонлигини оширишга қўшаётган ҳиссаси муҳим, машаққатли ва масъулиятли ҳисобланади.
Оғир об-ҳаво шароитларига қарамай, хоҳ у жазирама ёз бўлсин, хоҳ қаҳратон қиш — бурғиловчи доимо иш жойида бўлади. Бурғилаш бўйича режани бажариш вазифаси унинг зиммасида. Бурғилаш қудуқлари ходимлари ҳар сафар режани бажариш ва ортиғи билан бажариш бўйича янгидан янги рекордларни ўрнатмоқда.
36-сонли бурғилаш бригадаси ҳам жорий йилнинг 2 июль куни Ўзбекистон бўйлаб долото ёрдамида кавлаш бўйича навбатдаги рекордни қайд этди. Бир сутка давомида Tesco кучли узатмаси билан жиҳозланган ZJ-70 DBS бурғулаш қурилмаси ёрдамида, бир суткада 425 метр тупроқ бурғиланди. Шу тариқа 550 метр чуқурликдан юзага 79 кубометр жинслар чиқарилди. Бу битта темир йўл вагонига тенг миқдордир. Бурғилаш ишлари «Мустақилликнинг 25 йиллиги» конидаги №9-ОЭ қудуғида амалга оширилди.
Ишларни амалга ошириш учун лойиҳанинг бош муҳандиси Фозилов Имонжон томонидан бурғилаш бригадасига барча саъй-ҳаракатлар ва воситаларни ишга солган ҳолда, кавлаш бўйича режани бажариш ва ортиғи билан бажариш вазифаси юклатилди. 24 соат давом этган ишлар бошлаб юборилди. Бурғилаш жараёнини муҳандислар назорат қилди. Ҳамма нарса ҳисобга олинди: долотога тушаётган юклама, унинг ҳолати, тупроқнинг юзага олиб чиқилишини назорат қилиш.
Аввалги рекорд 362 метрни ташкил қилган эди. Олинган натижадан илҳомланган бурғиловчилар иш суръатини сусайтирмади ва бир сутка давомида 425 метр жой бурғиланди. Ўз вазифасини сидқидилдан бажарган бригада нафасини ростлаши мумкин. Олдинда уларни асосий мақсад — табиий газ олишдан иборат бўлган кўплаб вазифалар кутмоқда.
Eriell Group матбуот хизмати
Изоҳ (0)