Ижтимоий тармоқларда аҳоли ва ички ишлар ходими билан жанжал чиққани, маст ИИБ ходими 80 ёшли отахонни ниқоб тақмагани учун куч ишлатиб олиб кетмоқчи бўлаётгани айтилган видео тарқалди. Тошкент шаҳар ИИББ ҳолат юзасидан расмий маълумот берди.
Маълум қилинишича, 8 июль куни тахминан соат 10:40 ларда Шайхонтоҳур туманида истиқомат қилувчи 1972 йилда туғилган Д.М. 102 рақамига қўнғироқ қилиб, 1935 йилда туғилган отаси А.М. маст ҳолатда бўла туриб, уйда жанжал, тўполон кўтарганлигини маълум қилиб, ёрдам сўраган.
Ҳодиса жойига тезкорлик билан Шайхонтоҳур тумани ИИО ФМБ профилактика инспектори майор Улуғбек Яхшибоев етиб келган.
Профилактика инспектори, А.М.ни ички ишлар бўлимига олиб бориб, ҳолатни батафсил ўрганмоқчи бўлганида жанжалга қўшнилар аралашган. Вазиятдан тўлиқ хабардор бўлмаган (хусусан, ўз ўғли уй ичидаги жанжал ҳақида ички ишларга мурожаат қилганлиги юзасидан) қўшнилар нотўғри хулоса чиқариб, инспекторнинг хизмат фаолиятига тўсқинлик қилишган ва профилактика инспектори билан жанжал қилган.
«Видеотасвирда кўриб турганингиздек, ушбу маҳалла аҳолиси ички ишлар органи ходимининг фаолиятига фаол қаршилик кўрсатишган, вазиятни билмасдан, ҳолатни тўлиқ ўрганмасдан, профилактика инспектори билан конструктив тарзда суҳбатлашмасдан, унга қўполлик қилишган, унинг хизмат кийимига шикаст етказишган. Ҳозирда мазкур ҳолат юзасидан қонуний қарор қабул қилиш учун текширув ўтказилмоқда», — дейилади хабарда.
Қайд этилишича, профилактика инспекторига нисбатан Тошкент шаҳар ИИББ томонидан хизмат текшируви тайинлаган. Унинг ҳаракатлари ўрнатилган тартиб-қоидаларга мослиги тўлиқ ўрганилиб, қонуний баҳо берилади.
Изоҳ (0)