Таксичилик билан шуғулланувчи якка тартибдаги тадбиркорлар республиканинг қайси ҳудудида фаолиятини амалга оширишидан қатъи назар 2021 йил учун ҳар ойлик 150 минг сўм қатъий белгиланган миқдордаги ва ижтимоий солиқларни тўлайди. Бу ҳақда Давлат солиқ қўмитаси матбуот котиби Музаффар Назаров АОКАда ўтказилган брифинг давомида маълум қилди.
Шунингдек, улардан берилган лицензия варақаси бўйича бир йилга 245 минг сўм миқдорида давлат божи ундирилади.
«Бунда 2021 йилда 1 сентябргача ЯТТ сифатида давлат рўйхатидан ўтганлар учун давлат божи ундирилмайди», — дейди ДСҚ матбуот котиби.
Аввалроқ эксперимент тариқасида якка тартибдаги тадбиркорларга 4 та ўриндиқли енгил автотранспортда йўловчи ташиш фаолияти билан шуғулланиш ҳуқуқи берилаётгани ҳақида хабар берилганди. 2021 йил 1 сентябрдан бошлаб ЯТТ сифатида такси фаолияти билан шуғулланиш фақатгина мижозларни излаш бўйича интерактив хизмат кўрсатувчи компаниялар (агрегаторлар) хизмати орқали амалга оширилади. Якка тартибдаги тадбиркорларга такси фаолияти билан шуғулланиш учун бошланғич тўлов 5 баробарга камайтирилиб 690 минг сўмни, ойлик тўлов 1,5 баробарга камайиб 425 минг сўмни ташкил қилади.
Мавзуга доир: «Таксичилик фаолиятини соддалаштириш масаласига 2021 йилда ечим топилса керак» — меҳнат вазири
2020 йил октябрь охирларида Президент Шавкат Мирзиёев «Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида»ги фармонни имзолагани тўғрисида хабар берилганди. Мазкур фармон лойиҳаси ва унинг имзоланган версияси таққосланганида, ундан бир нечта банд, жумладан, жисмоний шахсларга ўзини ўзи банд қилиш учун йўловчиларни ташишга рухсат бериш тўғрисидаги банд жой олмагани маълум бўлганди.
2020 йилнинг декабрь ойида бўлиб ўтган матбуот анжуманида Давлат солиқ қўмитаси раиси ўринбосари Фазлиддин Умаров киракашлик билан шуғулланаётганлар ўзини ўзи банд қилувчи сифатида рўйхатдан ўтса, аҳолининг хавфсизлигини таъминлаш билан боғлиқ масала юзага келишини айтган эди. Шунингдек, у бу масала бўйича махсус ишчи гуруҳи тузилгани ҳамда мақбул ечим изланаётганини айтган.
Изоҳ (0)