O‘zbekistonda taksi haydovchilarini litsenziya talab qilinuvchi faoliyat turlari ro‘yxatidan chiqarish masalasi 2021-yilda hal etilishi mumkin. Bu haqda bandlik va mehnat munosabatlari vaziri Nozim Husanov AOKAda o‘tkazilgan matbuot anjumanida ma’lum qildi.
Vazirning ta’kidlashicha, bu faoliyat inson hayoti va salomatligi bilan bog‘liq va dunyoning aksar davlatlarida litsenziyalanadi.
2020-yil avgust oyidan o‘zini o‘zi band qilish tizimi takomillashtirildi. Bugungi kunga kelib, 67 turdagi faoliyat bilan shug‘ullanmoqchi bo‘lgan fuqarolar onlayn tartibda Davlat soliq qo‘mitasi saytida ro‘yxatdan o‘tib, faoliyat yuritishlari mumkin.Buning afzal tomoni shundaki, fuqaro belgilangan yillik to‘lovini to‘lasa, unga yillik pensiya staji qo‘shilib boradi. O‘tgan yili bu bazaviy hisoblash miqdorining 50 foiz (223 000 so‘mning yarmi, ya’ni 111 ming 500 so‘m) miqdorida edi, bu yil bu raqam 1 baravari miqdorida belgilandi (1-fevraldan 245 ming so‘m).
Ya’ni fuqaro bir yilga 245 ming so‘m to‘lasa, kelgusida unga pensiya hisoblashda stajini inobatga olishga asos bo‘ladi.
O‘zimga ham taksichilardan taksichilikni litsenziya talab qilinmaydigan faoliyat turiga kiritaylik, degan takliflar kelib turadi.
Lekin bu borada xorijiy davlatlar tajribasi o‘rganib chiqilganida, ularning aksariyatida bu faoliyat litsenziyalashtirilgan. Taksichilarga qator talablar bor. Chunki bu masalada eng asosiy jihat inson hayoti va salomatligi bilan bog‘liqdir. Biz shu tomonini e’tiborga olishimiz kerak.
Bu masalada ko‘plab muhokama-muzokaralar olib borilyapti. O‘ylaymanki, 2021-yilda bu mavzuga ham huquqiy yechim topilsa kerak.
Nozim Husanov, bandlik va mehnat munosabatlari vaziri
Mehnat vazirining birinchi o‘rinbosari Erkin Muhiddinov taksi haydovchilarini litsenziya talab qilinuvchi faoliyat turlari ro‘yxatidan chiqarish masalasi mehnat bozoriga foyda bo‘lishini, biroq yo‘lovchilarning xavfsizligini ta’minlash yo‘lida taksichilarning mashinasi doimiy ko‘rikdan o‘tkazilib turishi va haydovchilarning o‘zini ham sog‘lig‘i nazorat ostida bo‘lishi masalasi borligini ta’kidlab o‘tgan.
Mavzuga doir: Oliy Majlis deputatlari taksi haydovchilaridan litsenziya talab qilmaslik taklifini ilgari surdi
2020-yil oktabr oxirlarida Prezident Shavkat Mirziyoyev “Yashirin iqtisodiyotni qisqartirish va soliq organlari faoliyati samaradorligini oshirish bo‘yicha tashkiliy chora-tadbirlar to‘g‘risida”gi farmonni imzolagani to‘g‘risida xabar berilgandi. Mazkur farmon loyihasi va uning imzolangan versiyasi taqqoslanganida, undan bir nechta band, jumladan, jismoniy shaxslarga o‘zini o‘zi band qilish uchun yo‘lovchilarni tashishga ruxsat berish to‘g‘risidagi band joy olmagani ma’lum bo‘lgandi.
2020-yilning dekabr oyida bo‘lib o‘tgan matbuot anjumanida Davlat soliq qo‘mitasi raisi o‘rinbosari Fazliddin Umarov kirakashlik bilan shug‘ullanayotganlar o‘zini o‘zi band qiluvchi sifatida ro‘yxatdan o‘tsa, aholining xavfsizligini ta’minlash bilan bog‘liq masala yuzaga kelishini aytgan edi. Shuningdek, u bu masala bo‘yicha maxsus ishchi guruhi tuzilgani hamda maqbul yechim izlanayotganini aytgan.
Izoh (0)