Литва ноқонуний муҳожирлар оқими туфайли Беларусь билан чегарада девор қуради

Литва бош вазири Ингрида Шимоните ноқонуний мигрантлар оқимини чеклаш учун Беларусь билан чегарада қўшимча тўсиқ қуриш режасини эълон қилди, деб ёзади Meduza.

«Биз Литва ва Беларусни ажратиб турадиган қўшимча жисмоний тўсиқ қуришни бошлаймиз, бу ноқонуний мигрантлар оқимини уюштирувчилар учун аниқ белги ва тўхтатувчи восита бўлади», — деди ҳукумат раҳбари матбуот анжуманида. Унинг таъкидлашича, Литва ҳукумати чегарани қўриқлашни кучайтириш учун армияни жалб қилади.

Беларусь билан чегарада девор қуриш режалари 17 июнь куни Литва ички ишлар вазири Агне Билотайте томонидан эълон қилинган. Унинг сўзларига кўра, расмийлар девор қурилишини «муҳокама қилмоқда». Ички ишлар вазирлигининг аниқлик киритишича, улар турли хил вариантларни кўриб чиқмоқда — тиканли симлардан ёки сигнализациядан иборат бир ёки иккита девор қурилиши мумкин.

Литва ва Беларусь ўртасидаги чегара узунлиги 678,8 километрни ташкил қилади. Ҳозирда чегаранинг 78 километрлик қисмига девор ўрнатилган. Тахминан 92,5 километр масофага девор ўрнатиш мумкин эмас, чунки у ерда чегара сув ҳавзалари орқали ўтади. Шундай қилиб, чегаранинг 508 километр қисмига девор ўрнатиш керак бўлади.

Литва Ички ишлар вазирлигининг маълумотларига кўра, бир километр девор ўрнатиш нархи 30 минг еврони ташкил қилиши мумкин. «Бундан ташқари, девор бўйлаб видеокамералар, датчиклар ва бошқаларни бирлаштириш керак. Чегаранинг бир километри учун уларни ўрнатиш 130 минг еврога тушади», — дейилади вазирлик хабарида.

Июль ойи бошида Литва Беларусдан келаётган ноқонуний мигрантлар оқими туфайли фавқулодда вазият режимини эълон қилди ва чегара хавфсизлигини кучайтирди. 2021 йил бошидан буён Беларусь ҳудуди орқали, асосан, Яқин Шарқ ва Африка мамлакатларидан 1400 дан ортиқ муҳожир Литвага кириб келган. Литва ҳукуматининг даъво қилишича, муҳожирлар Беларусдан атайин Литва чегараси томон жўнатилмоқда.

Беларусда 2020 йилги президент сайловлари ва ундан кейинги оммавий норозилик ва репрессиялардан сўнг Беларусь мухолифатининг мамлакатни тарк этган кўплаб тарафдорлари ва етакчилари Литвада яшайди. Сайловларда Александр Лукашенконинг рақиби бўлган Светлана Тихановская ҳам Литвада яшайди.

Май ойида Александр Лукашенко Беларусь Европа томон ноқонуний мигрантлар ва гиёҳванд моддалар транзитига тўсқинлик қилмаслигини айтди ва буни Европа давлатлари Беларусга қарши «гибрид урушни бошлагани» билан изоҳлади.