Россия Афғонистондаги вазият билан боғлиқ ҳолда иттифоқчиларни ҳимоя қилиш учун ўзининг Тожикистондаги ҳарбий базаси имкониятларидан фойдаланишга тайёр. Бу ҳақда Россия Ташқи ишлар вазирлиги раҳбари Сергей Лавров матбуот анжуманида айтиб ўтди, деб ёзади «РБК».

Фото: «ТАСС»

«Биз иттифоқчиларимизга қарши тажовузкор бостириб киришларнинг олдини олиш учун ҳамма чорани кўрамиз, шу жумладан, Тожикистоннинг Афғонистон билан чегарасида жойлашган Россия ҳарбий базаси имкониятларидан фойдаланамиз», — деди Лавров.

Вазир «Коллектив хавфсизлик шартномаси ташкилоти (КХШТ) доирасидаги мажбуриятлар тўлиқ кучда қолишини» қўшимча қилди. Унинг сўзларига кўра, ташкилот котибияти вакиллари тожик-афғон чегараси ҳудудига ташриф буюрган ва вазият тўғрисида доимий кенгашга хабар беради.

Лавровнинг таъкидлашича, АҚШ ва НАТО қўшинларининг Афғонистондан чиқиб кетиши фонида мамлакатдаги вазият «тез ёмонлашишга мойил».

Тожикистон ҳудудидаги 201-ҳарбий база Россиянинг ўз чегараларидан ташқаридаги энг йирик ҳарбий объекти ҳисобланади. У Душанбе ва Бўхтар шаҳарларида жойлашган. 2012 йилда ушбу базанинг 2042 йилгача Тожикистонда қолиши тўғрисида қарор қабул қилинди. Унинг таркибига моторли милтиқ, артиллерия, разведка, зенит-ракета ва бошқа қисмлар киради. 2015 йил сентябрь ойидан бошлаб таркибга ҳарбий ҳаво гуруҳи ҳам қўшилди. 2020 йилда базага 20 га яқин янги ва модернизация қилинган ускуналар, жумладан, Ми-8-МТВ5-1 ташувчи жанговар вертолётлари, пиёдалар учун модернизация қилинган БМП-2М жанговар машиналари қабул қилинди.

2017 йил апрель ойида мудофаа вазири Сергей Шойгу 201-базани мустаҳкамлаш зарурлигини маълум қилган ва буни объектнинг Афғонистон чегараларига яқинлиги ҳамда у ерда келиб чиқадиган террорчилик хавфи билан изоҳлаган. 2021 йил май ойида Владимир Путин мустаҳкамлаш ишлари давом этаётганини эълон қилганди.

5 июль куни Тожикистон президенти Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этгани,Владимир Путин Тожикистонга Афғонистон билан чегарадаги вазиятнинг кескинлашуви муносабати билан ёрдам беришни ваъда қилгани, Ўзбекистон Президенти Шавкат Мирзиёев 5 июль куни Владимир Путин билан телефон орқали мулоқот қилиб, суҳбат давомида Афғонистоннинг шимолий ҳудудларидаги аҳвол ёмонлашиши фонида Марказий Осиёдаги вазиятнинг ривожига алоҳида тўхталиб ўтгани ҳақида хабарлар берилганди.

Шунингдек, Туркманистон Афғонистон билан чегара ҳудудидаги ҳарбий сафарбарликни кучайтиради.