Тошкент ҳалқа йўли ерости метрополитенида олиб борилган қурилиш ишларида 899 миллион сўм талон-торож қилинган ва ушбу ҳолатлар юзасидан жиноий иш қўзғатилгани ҳақида хабар берилганди. Бу юзасидан «Ўзбекистон темир йўллари» расмий баёнот берди.
Маълум қилинишича, «Ўзбекистон темир йўллари» томонидан 2019 йилда Тошкент метрополитени ерусти ҳалқа йўлининг биринчи босқичи бўлган 11 километрлик «Дўстлик-2» – «Қўйлиқ» участкасида қурилиш ишлари бошланган. Ушбу лойиҳа қурилиши 2020 йилнинг март ойида тўлиқ тугатилиб, фойдаланиш учун топширилишга тайёр бўлган.
Бироқ бутун дунёда кенг тарқалган COVID-19 касаллигининг Ўзбекистонга кириб келиши оқибатида карантин чоралари кучайтирилиши сабабли мазкур йўналишнинг очилиши номаълум вақтга қолдирилган. Қурилишда иштирок этган барча ишчи-хизматчилар карантин чоралари юмшатилгунга қадар ўзларини изоляция қилган.
2020 йилнинг 3 июль куни «Ўзбекистон темир йўллари»га қарашли «1-сонли Энергомонтаж поезди» унитар корхонаси ходимлари Тошкент метрополитенининг ерусти «Дўстлик-2»—«Қўйлиқ» участкасини кўрикдан ўтказишганда моддий товар (кабел маҳсулотлари)нинг ўз жойида йўқлиги аниқланган ва ушбу ҳолат бўйича зудлик билан Ички ишлар вазирлиги Транспортда хавфсизликни таъминлаш бош бошқармасининг ҳуқуқни муҳофаза қилувчи орган ходимларига ариза шаклида мурожаат қилинган (қуйидаги суратда).
Дастлабки тергов натижаларига кўра, умумий қиймати 899 131 590 сўмлик кабел маҳсулотлари номаълум шахслар томонидан ўғирланган. Олиб борилган тергов ҳаракати натижаларига кўра, айбдор шахслар ҳамда йўқолган моддий товар (180 962 364 сўмлик) топилиб, Жиноят кодексининг тегишли моддаларига биноан жиноятчилар ўрнатилган тартибда жавобгарликка тортилган. Бугунги кунда етказилган 180 962 364 сўмлик зарар айбдорлардан тўлиқ ундирилган.
Айни пайтда ушбу ҳолат юзасидан Ички ишлар вазирлиги Транспортда хавфсизликни таъминлаш бош бошқармаси томонидан тергов ва қидирув ишлари давом этмоқда.
Бундан аввал UzAuto Motors заводига олиб келинаётган пўлат листларнинг бир қисми талон-торож қилингани, Ўзбекистондаги иккита ОТМ бухгалтерлари 22,5 млрд сўмни ўзлаштиргани аниқлангани ҳамда Бухорода мактабни таъмирлашда талон-торожликка йўл қўйган қурилиш ташкилоти раҳбари жавобгарликка тортилгани ҳақида хабар берилганди.
Изоҳ (0)