Самарқанд шаҳрида 1000 қути акциз маркаси бўлмаган сигаретни сотмоқчи бўлганлар ушланди. Бу ҳақда «Дарё»га вилоят Божхона бошқармаси ахборот хизмати маълум қилди.
Таъкидланишича, вилоят Божхона бошқармаси Контрабандага қарши курашиш ва божхона аудити бўлими томонидан вилоят ҳудудида тамаки маҳсулотларининг ноқонуний олди-сотдиси билан шуғулланувчи фуқароларни аниқлаш мақсадида олдиндан олинган маълумотга асосан тезкор тадбир ўтказилган.
Тезкор тадбир давомида Самарқанд шаҳри Чўлпон кўчасида яшовчи фуқаро Н.Н. тадбир иштирокчилари томонидан иккита катта ҳажмдаги қутиларда жами 1000 қути (пачка) тамаки маҳсулотини сотмоқчи бўлганида тўхтатиб қолинган.
Дастлабки суриштирувда фуқаро Н.Н.га тегишли бўлган тамаки маҳсулотлари Ўзбекистон Республикаси акциз маркалари билан маркаланмаган, жами қиймати 10 миллион 500 минг сўмлик «Милано» ҳамда «Монд» номли тамаки маҳсулотлари экани маълум бўлган.
Ҳозирда мазкур ҳолат юзасидан божхона органлари томонидан терговга қадар текширув ҳаракатлари олиб борилмоқда.
Изоҳ (0)