Британиялик олимлар томонидан ўтказилган янги тадқиқотларда чанқаган ҳолда автомобиль бошқариш хавфли экани аниқланди — суюқликнинг етишмаслиги ҳайдовчининг диққатини жамлашига халақит бериб, аварияга олиб келадиган қатор хатоликларни содир этишига сабаб бўлади. Умуман олганда организмнинг сувсизланиши алкоголь ичимлик ичгандек таъсир кўрсатади — ҳайдовчи маст инсон каби паришон ва бепарво бўлиб қолади, деб хабар берди Motor.
Маълумки, алкоголь когнитив функцияларга қаттиқ таъсир кўрсатади, шу сабабли автомобилни маст ҳолда бошқариш жуда хавфли ва қонунга зид. Чанқаган ҳолда машина бошқариш ҳақида эса ҳеч ким сўрамайди, аммо Британиянинг Leasing Options компанияси тадқиқотларига кўра, бу ҳам катта хатарни юзага келтиради. Ҳатто бироз чанқоғи бор ҳайдовчи ҳам рулда диққатини йўқотиб, бошқарув вақтида қатор хатоликларга йўл қўяди. Бу компьютер симуляторда автомобиль бошқарган 11 нафар эркак иштирокидаги янги тадқиқот давомида тасдиқланган.
Уларнинг ҳар бири уч сеансдан иборат машина бошқарувида иштирок этган бўлиб, биринчиси таништирув, қолган иккитасида ҳайдовчи икки соатли виртуал бошқарувни амалга оширган.
Ҳолатларнинг бирида ҳайдовчи мунтазам сув ичган, иккинчисида бу каби имкониятдан маҳрум этилган. Мия фаоллигини махсус датчиклар кузатиб борган. Натижаларнинг кўрсатишича, чанқоқ вақтида ҳайдовчи қоидабузарликларга кўп йўл қўяди — асосан ҳаракатнинг қўшни полосасига ўтиб кетади ёки жуда кеч тормоз босади. Тадқиқот хулосасида рул бошқараётган вақтида мунтазам суюқлик ичиш тавсия этилган.
Изоҳ (0)