«Форсаж» франшизаси режиссёри Жастин Линнинг маълум қилишича, фильмнинг 10 ва 11-қисмларида 2013 йилда вафот этган Пол Уокер экранга қайтиши мумкин, деб хабар беради «Фильм.ru». Уокер пойга сагасининг асосий юлдузларидан бири эди, бироқ фильмнинг еттинчи қисми премьераси арафасида у автоҳалокат оқибатида вафот этган.
Линнинг CinePOP’га берган интервьюсига кўра, Пол Уокер CGI-технологияси ёрдамида экранга қайтарилиши мумкин.
«Пол ва унинг қаҳрамони Брайан фильмнинг қалби ва юраги эканлиги аниқ, шу сабабли кейинчалик қандай ҳаракатланишимиз шунга боғлиқ. Унинг қайтиши — бу ҳақда ҳар куни ўйлайдиган нарсам. Франшизанинг якунига яқинлашар эканмиз, бу ўзим билан ўзим ўтказадиган мунтазам суҳбатга айланган», — дейди у.
Бир қарашда Линнинг ғояси амалга ошириб бўлмасдек туюлгани билан, у фильмнинг еттинчи қисмида қисман амалга оширилган эди. Ўшанда актёрнинг вафотидан сўнг сценарий қайта ёзилган, экранда эса унинг Коди ва Калеб исмли ака-укалари пайдо бўлган ҳамда улар ёрдамида Полнинг ташқи кўриниши яратилган. Шу билан бирга, бу каби амалиёт Голливудда борган сари оммалашмоқда.
Бундан ташқари, аввалроқ Вин Дизель фильмга Уокернинг қизи Медоуни таклиф этилиши мумкинлигини маълум қилганди. Ҳозирча буларнинг қайси бири амалга оширилиши номаълум.
Аввалроқ 25 июнь куни экранларга чиққан «Форсаж-9» жангари фильми АҚШдаги прокатининг уч кунида 70 миллион доллар тўплаб, рекорд ўрнатган эди.
Изоҳ (0)