“Forsaj” franshizasi rejissori Jastin Linning ma’lum qilishicha, filmning 10 va 11-qismlarida 2013-yilda vafot etgan Pol Uoker ekranga qaytishi mumkin, deb xabar beradi “Film.ru”. Uoker poyga sagasining asosiy yulduzlaridan biri edi, biroq filmning yettinchi qismi premyerasi arafasida u avtohalokat oqibatida vafot etgan.

Linning CinePOP’ga bergan intervyusiga ko‘ra, Pol Uoker CGI-texnologiyasi yordamida ekranga qaytarilishi mumkin.

“Pol va uning qahramoni Brayan filmning qalbi va yuragi ekanligi aniq, shu sababli keyinchalik qanday harakatlanishimiz shunga bog‘liq. Uning qaytishi — bu haqda har kuni o‘ylaydigan narsam. Franshizaning yakuniga yaqinlashar ekanmiz, bu o‘zim bilan o‘zim o‘tkazadigan muntazam suhbatga aylangan”, — deydi u.

Bir qarashda Linning g‘oyasi amalga oshirib bo‘lmasdek tuyulgani bilan, u filmning yettinchi qismida qisman amalga oshirilgan edi. O‘shanda aktyorning vafotidan so‘ng ssenariy qayta yozilgan, ekranda esa uning Kodi va Kaleb ismli aka-ukalari paydo bo‘lgan hamda ular yordamida Polning tashqi ko‘rinishi yaratilgan. Shu bilan birga, bu kabi amaliyot Gollivudda borgan sari ommalashmoqda.

Bundan tashqari, avvalroq Vin Dizel filmga Uokerning qizi Medouni taklif etilishi mumkinligini ma’lum qilgandi. Hozircha bularning qaysi biri amalga oshirilishi noma’lum.

Avvalroq 25-iyun kuni ekranlarga chiqqan “Forsaj-9” jangari filmi AQShdagi prokatining uch kunida 70 million dollar to‘plab, rekord o‘rnatgan edi.