Жанг санъати намуналари ва кулгини бир фильмда мужассам қиладиган машҳур актёр Жеки Чаннинг жиддий жароҳатланишга сабаб бўлган трюклари ҳақида маълумот бериб ўтамиз.
«А лойиҳаси» (1983) — 8 метр баландликдан йиқилган
Жеки Чан энг жиддий жароҳатларидан бирини «А лойиҳаси» фильмини суратга олиш майдончасида олган. Сюжетга кўра, Чан гавдалантирган қаҳрамон бинодан чиқади ва соат стрелкасини ушлаган вақти орқадан душмани итаргани учун осилиб қолади. Оқибатда 8 метр баландликдан матодан тикилган том устини тешиб ерга тушади. Дастлабки илк дублдан қониқмагани сабаб саҳнани такрор суратга олишга қарор қилади. Айнан шу жараёнда актёр ерга йиқилиб, синдириб олишига сал қолади. Оғриқнинг кучлилигига қарамай, Чан ўзини қўлга олиб саҳнани охиригача ижро қилган.
«Полиция тарихи» (1985) — Баландликдан йиқилиш давомида аввалига тўсиқ сўнгра шийпонга урилиб, ерга зарб билан тушган
Чан ижросидаги энг яхши фильмлардан бири бошидан-охиригача турли трюкларга бой экани билан ўзига хосдир. Савдо маркази зинасида Жеки ижро қилган қаҳрамонни икки рақиби уни тўсиқнинг устидан ерга отиб юборади. Жеки дарахтдан ясалган шийпонга урилиб, унинг бўлаклари билан бирга ерга йиқилади. Бу вақт полда ҳеч қандай сетка ёки тўшак бўлмайди. Ушбу саҳнадан кейин суратга олиш жамоаси зарб билан тушган актёрни кўтариб, ўзига келишига ёрдам бериш учун олиб кетган.
«Полиция тарихи» (1985) — Устундан йиқилган
Ушбу фильмдаги яна бир эсда қоларли, аммо актёр учун оғир бўлган саҳна ҳам мазкур савдо марказида олинган. Жеки балкондан атрофида электр гирляндлар бўлган металл устун бўйлаб сирпанади ва охири шиша томга бориб урилади. Экранда қойилмақом кўринган ушбу саҳна Жекига қимматга тушган: бир неча марта ток урган, қўллари куйган ва кесилган, ҳатто бармоқларини ҳам синдириб олган. Бу ҳам етмагандек тоc суяги жароҳатланиб, умуртқа поғонаси шикастланган.
«Тангри аслаҳаси» (1986) — Боши билан тошга урилган
Актёрга жарлик устидан дарахт орқали сакраб ўтиш саҳнасининг биринчи дубли ёқмаган. У ўзини етарлича тез ҳаракатланмаган деб ҳисоблаган. Иккинчи уринишда эса орқаси билан йиқилиб, боши билан тошга урилган. Зарбдан бош суягининг бир қисми бош миясига кириб кетган актёрнинг ҳаёти шифокорларнинг тезкор ҳаракати сабаб сақлаб қолинган. Шундан буён Чаннинг қулоқларидан бири иккинчисидан кўра ёмонроқ эшитади.
«Полиция тарихи-2» (1988) — Ҳаракатланаётган автобус устида шишага урилиб, қаттиқ жароҳатланган
Полициячи Кевин Чан саргузаштлари давомида автобуснинг устига сакрайди ва бошқарувсиз автобус устидаги қаҳрамон шишали реклама банерига бориб урилади. Ушбу саҳнани суратга олиш учун хавфсиз шиша тайёрланганига қарамай, Жан ҳисобда адашган ва ҳақиқий шишага урилган. Оқибатда бўйни, қўллари, кафтлари ва юзи жароҳатланган. Монтажда ҳаммаси тўғриланганига қарамай, у суратга олиш жараёни тугагунича боғлов билан юрган.
«Тангри аслаҳаси-2: Кондор операцияси» (1991) — Занжирдан сирпаниб тушиб кетган
Фильмнинг финалига бироз қолганида Жеки осилган занжирдан туртиб чиққан қисмга бориб урилади. Шунчалик зарб билан урилганидан актёрнинг кўкрак суяги жойидан силжийди.
«Полиция тарихи 3: Суперполициячи» (1992) — Узоқ вақт давомида осилиб туришдан елка мушаклари қаттиқ зўриққан
Саҳналардан бирида осилиб турган Жеки ҳаракатланиб келаётган вертолётдан ўзини четга олиши керак бўлган, аммо ундай қилмаган. Учаётган вертолётнинг осма нарвонида узоқ вақт давомида, қутқарув жамоаси келиб ёрдам бермагунича осилиб тургани сабаб текширувдан кейин актёрнинг елка мушаклари жиддий зўриққани маълум бўлган.
«Жиноят ҳақида ҳикоя» (1993) — Иккита автомобилнинг ўртасида қисилиб қолган
Актёр саҳналардан бирида иккита автомобилнинг ўртасида қисилиб қолган. Оқибатда оёқлари синган ва 3 ой шифохонада даволанишга мажбур бўлган. Аммо суратга олиш майдончасига қайтгач, ўйлаб ҳам ўтирмай ушбу трюкни такрорлаган.
«Бронксдаги машмаша» (1995). Сакраб жароҳатланган
Ўзининг Голливуддаги илк муваффақиятли лойиҳасида сюжетга кўра баландликдан сакраган актёр оёғини нотўғри қўйгани ҳисобига тўпиғини синдириб олган. Синган суяклари битишини кутиш ўрнига актёр гипс устидан резинали пайпоқ кийиб суратга тушишда давом этган. Бу трюк бошқаларига қараганда у қадар хавфли эмаслигига қарамай, актёрнинг ишига қандай муносабатда эканини кўрсатади.
Изоҳ (0)