Тошкент шаҳри Миробод туманида вазирликда ишлашини айтиб, фуқарони 10 минг доллар эвазига ўқишга киритиб қўйишни ваъда қилган шахс ушланди. Бу ҳақда Бош прокуратура ҳузуридаги Департамент хабар берди.
Маълум қилинишича, Бош прокуратура ҳузуридаги Департамент ҳамда ДХХнинг Миробод тумани бўлимлари томонидан тезкор тадбир ўтказилган. Тадбир давомида муқаддам фирибгарлик ва бошқа жиноятлари учун судланган Д.А. фуқаро Р.га ўзини Олий таълим вазирлигида ишлашини айтиб, уни 10 минг АҚШ доллари эвазига Қирғизистондаги халқаро университетга ўқишга киритиб қўйишни ваъда қилгани аниқланган. Д.А. сўнгра юқори лавозимда ишловчи танишлари орқали Р.нинг ўқишини Тошкент Педиатрия институтига кўчиртириб беришга ишонтирган ва ундан 8 минг долларни қўлга киритган.
Қолган 2 минг долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода талабанинг ўқишини сиртқи бўлимга кўчириб бериш учун 500 доллар сўраган декан ўринбосари ушлангани, Чирчиқ давлат педагогика институтига ўқишга киритиб қўйиш учун икки кишидан 9 минг доллар олган яна бир шахс қўлга олингани, Қорақалпоқ давлат университетига ўқишга киритиб қўйиш учун 25 миллион сўм талаб қилган ассистент ушлангани тўғрисида хабар берилганди.
Изоҳ (0)