Президент Шавкат Мирзиёев 30 июнь куни Ботаника боғида ўтказилган Ўзбекистон ёшлари ва талабалари форумида ахборот технологияларини ривожлантиришга алоҳида аҳамият қаратилиши ҳақида гапирди, дея хабар бермоқда «Дарё» мухбири.
«Мактабларда ўқувчиларни компьютердан шунчаки фойдаланувчи эмас, балки ундан даромад топадиган мутахассислар қилиб тайёрлашимиз зарур. Шу мақсадда, жорий йил якунига қадар умумтаълим мактабларини юқори тезликдаги интернетга улаш ишлари якунланади. Республика бўйича қўшимча 5 мингта компьютер синфлари ташкил этилади.
Мактабларда ахборот технологиялари дарслари замонавий Кембриж дастурлари асосида йўлга қўйилади ва ўқитувчилар ҳам ушбу дастурлар асосида қайта тайёрланади. Худди шундай тизим барча олийгоҳларда ҳам жорий қилинади», — деди Президент.
Давлат раҳбари 2021 йил якунигача Қорақалпоғистон, Андижон, Самарқанд, Сирдарё ва Навоийда ёшлар технопарклари фойдаланишга топширилишини маълум қилди.
«Келгуси йили Бухоро, Жиззах, Қашқадарё, Наманган, Фарғона, Хоразм ва Сурхондарёда ҳам шундай технопарклар барпо этилади. Шунингдек, ёшларнинг стартап ғояларини саралаб олишнинг очиқ-ошкора тизими йўлга қўйилиб, энг яхши лойиҳаларни молиялаштиришга келгуси йилда бюджетдан 100 миллиард сўм маблағ ажратамиз.
Вилоят ҳокимлари ёшларнинг ‘Бизнесга биринчи қадам’ стартап лойиҳалари танловини жорий этиб,ҳар бир тумандан камида учтадан ғолибларга маҳаллий бюджетдан грантлар бериб боради. Битта грантнинг суммаси ўртача 50 миллион сўмни ташкил этади.
Бу ишларни самарали ташкил этишга Ахборот технологиялари ва Инновация вазирликлари, Ёшлар агентлиги ҳамда уларнинг қуйи тузилмалари масъул бўлади», — деди Шавкат Мирзиёев.
Изоҳ (0)