Тошкент шаҳрида ДХХ тасарруфидаги «Ёшлик» спорт мажмуасида ковид-марказ қайтадан ташкил этилди. Бу шаҳар ҳокимлиги матбуот хизмати эълон қилган видеода маълум бўлди.

Видеода ушбу марказга Жаҳонгир Ортиқхўжаев борганини кўриш мумкин. Маъсул ходимнинг қайд этишича, марказ 2 июль куни соат 00:00 дан бошлаб фаолиятини бошлади.

Марказ умумий ҳисобда 504 нафар беморга мўлжалланган. Жумладан 60 ўринли реанимация бўлими тайёр ҳолатга келтирилган. Шифохонада барча нарса шай ҳолатга келтирилган ва беморларни кутиб олиш учун шифокорлар гуруҳи жалб қилинган.

Жаҳонгир Ортиқхўжаев Тошкент шаҳар Соғлиқни сақлаш бошқармаси раҳбари ва бошқа маъсулларга яна бир қанча ковид-марказларни шу кунларда очиш кераклигини маълум қилди. Унинг сўзларига кўра, 5 июль, душанба куни «Ўзэкспомарказ»да коронавирусга чалинган беморларни қабул қилиш маркази фаолияти ҳам қайта ташкил этилади.

Эслатиб ўтамиз, 2020 йил ноябрь ойининг охирларида «Атлас» ва «Ёшлик» коронавирусга ихтисослашган марказлари, 2020 йил 9 декабрь куни эса «Ўзэкспомарказ»даги ковид-марказ ёпилганди. Ўшанда касаллик динамикаси ошганда ёпилган объектлар тезкор равишда қайта очилиши маълум қилинганди.

Мамлакатда кунлик касалланиш ҳолатлари сони яна ортиб бормоқда. Шу сабабли республика бўйлаб 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди.

Маълумот учун, 25 июнь куни коронавирус инфекциясини юқтириб олиш билан боғлиқ 546 та янги ҳолат рўйхатга олиниб, кунлик касалланиш бўйича 2021 йилнинг энг юқори кўрсаткичи бўлганди. 30 июнь куни эса 476 кишида коронавирус аниқланган.