Сурхондарё вилояти Термиз туманида 50 сотих ерни ноқонуний равишда 150 миллион сўмга сотмоқчи бўлган шахс қўлга олинди, дея хабар қилмоқда Бош прокуратура ҳузуридаги Департамент матбуот хизмати.
Қайд этилишича, Департаментнинг Термиз туман бўлими томонидан Миллий гвардия вилоят бошқармаси билан ҳамкорликда ўтказилган тезкор тадбирда фуқаро Н.Қ. фирибгарлик йўли билан даромад орттиришни кўзлаб, фуқаро О.ни «Янгиобод» МФЙда жойлашган 50 сотих ер майдони ўзига тегишли эканига ишонтириб, танишлари орқали ҳужжатларни расмийлаштириб бериши эвазига 150 миллион сўмга сотишга келишиб, шундан 84 миллион сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Бундан аввал Жиззах ва Бухорода ерларни ноқонуний равишда сотиш ҳолатлари аниқлангани, Қаршида ҳокимлик захирасида турган бўш ерни 70 миллион сўмга сотмоқчи бўлган шахс ушлангани ҳамда Самарқанд ва Қаршида ерни ноқонуний равишда сотаётган собиқ мансабдор ва ҳокимлик вакили ушлангани ҳақида хабар берилганди.
Изоҳ (0)