Ижтимоий тармоқларда Зангиотадаги коронавирусга чалингани гумон қилинган беморларни даволашга мўлжалланган юқумли касалликлар шифохонаси коридорлари одамлар билан тўла экани (уларнинг аксарияти касалликка чалингани тахмин қилинмоқда), тартибсиз муҳит юзага келгани, ҳар ёқдан йўтал овозлари эшитилаётгани акс этган видеоёзувлар тарқалди.
Зангиота 2-сон юқумли касалликлар шифохонаси директори Дониёр Миразимов «Дарё» мухбири билан суҳбатда видеоёзувлардаги ҳолат ҳақиқатан ҳам Зангиотадаги касалхонада юз бергани, бундай ҳолат 1 июль куни соат 19:00 атрофида кузатилганини тасдиқлади.
«Беморлар оқими кескин ошиб кетганлиги ва улар сараланмагани, барча беморларнинг МСКТ, рентген, ПЗР анализларини олиб, саралаш учун кўп вақт ва ресурс талаб этилгани сабабли шундай тирбандлик пайдо бўлган», — дейди шифокор Миразимов.Касалхона раҳбарининг қўшимча қилишича, видеода акс этган ҳолат («тирбандлик») соат 22:00 га келиб бартараф этилган, бунинг учун барча бўлим мудирлари, катта ҳамширалар ва бўш персонал ёрдамга сафарбар қилинган.Аввалроқ, июнь ойи охирида Зангиота 1-сон юқумли касалликлар шифохонаси директори Анвар Ҳусанов «айни пайтда 2016 та ўринга эга бўлган шифохонада 1,4 мингдан ортиқ бемор белгиланган стандартлар бўйича даволанаётгани»ни маълум қилган эди. Ўша вақтда 232 ўринли реанимация бўлимларида 29 та бўш жой борлиги таъкидланган эди.
Коронавирус инфекцияси тарқалиши билан боғлиқ вазият оғирлашгани муносабати билан 28 июндан 12 июлгача кучайтирилган карантин тадбирлари кўрилиши эълон қилинган эди (амалда ушбу тадбирларнинг асосан емакхоналар фаолиятини 20:00 дан кейин тўхтатиш қисми бажарилди, холос). 2 июлдан Тошкентда вақтинчалик ковид-марказлар фаолияти қайта тиклана бошланди.
Изоҳ (0)