Россия президенти Владимир Путин ўзининг ўрнини эгаллаши мумкин бўлган ворис ҳақида гапириб, президентликка муносиб номзодни айта оладиган вақт ҳали келишини билдирди. Бу ҳақда у «РБК»да трансляция қилинган жонли эфир давомида гапирди.
«Президентликка номзодини қўядиган кишиларга тавсиялар бериш менинг зиммамдаги масъулият. Дунёнинг барча мамлакатларида шундай. Бу борада бирорта истиснони билмайман. Албатта, вақти келади ва умид қиламанки, фалончи одам менинг фикримча, бизнинг она ватанимиз Россия каби ажойиб мамлакатни бошқаришга лойиқдир, дея оламан», — деди Путин.
Россия президенти муқаддас жой ҳеч қачон бўш қолмаслигини ва ўрнини босадиган одамлар топилишини таъкидлади.
Собиқ президент Борис Ельциннинг мисолидан келиб чиқиб, ҳозир ҳам Путин ихтиёрий равишда ҳокимиятни кимгадир ўтказиши мумкинми, деган мавзуда сўз кетар экан, Путин ҳокимиятни унга Ельцин ўтказмагани, у мамлакатни тегишли қонун асосда бошқарганини таъкидлади.
«Гап шундаки, бизнинг асосий қонунимизга биноан, агар президент ўз ваколатларини тарк этса, Россия Федерацияси ҳукумати раиси амалдаги президентга айланади. Мен ҳукумат раиси эдим», — деб тушунтирди Путин.
1999 йилда Ельцин уни ҳукуматни бошқаришга таклиф қилган суҳбатни эслаб, Путин дастлаб буни рад этганини айтди. Путиннинг сўзларига кўра, Елсин жуда ажабланган ва бунинг сабабини сўраган. ‘Мен унга Борис Николаевич, мен тайёр эмасман’ дегандим. Ваҳоланки, кап-катта одам эдим», — деди президент.
Путин ҳар қандай касб эгаси мамлакатни бошқариши мумкинлигини таъкидлади, аммо ҳуқуқий билим ва қонунларни билиш давлат раҳбари бўлишга ёрдам беради. Унинг сўзларига кўра, энг асосийси, президент бўлишга қарор қилган инсон ҳаётининг муҳим қисмини бутунлай ўз ишига бағишлашга тайёр бўлиши керак.
Сўнг Путин 2000 йилдан бери ворис танлаш ҳақида ўйлаётганини, аммо якуний қарорни фуқаролар қабул қилишини айтди. «Бўлажак раҳбар нима ишда, қандай фаолият юритаётгани муҳим эмас, у кимнинг қандай вакили бўлиши аҳамиятсиз, ҳал қилувчи овозни сайловчи беради», — дея таъкидлади у.
1999 йил августда, Путин Федерал хавфсизлик хизмати директори ва Россия Хавфсизлик кенгаши котиби бўлиб ишлаётганида, Ельцин уни ҳукумат бошлиғи лавозимига номзод қилиб кўрсатган ва кейинроқ телевизион мурожаатида уни ўз вориси деб атаган.
1999 йил 31 декабрда Ельцин истеъфога чиққач, Путин президент вазифасини бажарувчи бўлди. 2000 йил 26 мартда у президентлик сайловларининг биринчи босқичида ғалаба қозонди ва 2000 йил 7 майдан расмий равишда давлат раҳбари бўлиб иш бошлади.
Эслатиб ўтамиз, 5 апрель куни Владимир Путин ўзига яна давлат раҳбарлиги лавозимини эгаллаш учун сайловларда иштирок этиш имконини берувчи қонунни имзолади.
Изоҳ (0)