Uzbekistan Airports компанияси пойтахт аэропортидан учаётганда йўловчиларга хизмат кўрсатиш сифатини яхшилаш мақсадида Тошкент халқаро аэропорти терминали эстакадасини очишни ташкиллаштиради, деб хабар беради «Gazeta.uz».
Эстакада бўйлаб автотранспорт воситалари ҳаракати 2021 йил 10 июлдан тест режимида ишга тушади.
Компаниядагиларнинг таъкидлашича, эстакада майдони — умумий платформа узунлиги — 110 метр, эни — 9,5 метр бўлиб, у барча автотранспорт воситаларининг ўтишига имкон бермайди. Шу сабабли тест даврининг биринчи босқичида учиш терминалига ўтиш қисмини Тошкент халқаро аэропорти билан шартнома имзолаган лицензияга эга таксилар, Ўзбекистон Туризм ва спорт вазирлигининг аризасига кўра, туристик автобуслар ҳамда микроавтобуслар, VIP ва Business Lounge орқали хизмат кўрсатиладиган хориж делегациялари автотранспортлари учун очиш режалаштирилмоқда.
Эстакада бўш жой бўлса, автоматик равишда очиладиган шлагбаумлар (ҳар бир полосага), йўл тўсиқлари (антитаран), бўш жой борлиги ёки йўқлиги тўғрисида маълумот берувчи табло, автотранспорт воситаларидаги ёт предметларни аниқлаш учун мўлжалланган сканер (ҳар бир полосага), шунингдек, навбатчи оператор учун автоматлаштирилган назорат кузатув пункти билан жиҳозланади.
Бутун эстакада бўйлаб транспорт воситаларининг рақамларини танийдиган, турини аниқлай олувчи ва улар томонидан йўл ҳаракати қоидаларига риоя қилинишини назорат этувчи интеллектуал видеокузатув камералар тизими ўрнатилган. Кейинчалик автоуловларнинг давлат рақамларини таниб олиш технологияси ҳамда нақд ва нақд пулсиз тўхташ жойи учун тўловларни амалга ошириш имконини берадиган замонавий автоматлаштирилган тўхташ тизимини жорий этиш режалаштирилган.
Тошкент халқаро аэропортига эстакада орқали ўтиш қоидалари
- Эстакаданинг ўнг линияси туристик автобуслар ва микроавтобуслар учун мўлжалланган;
- Эстакаданинг чап линияси таксилар ҳаракати учун мўлжалланган;
- Туристик автобус ва микроавтобуслар учун эстакада бепул, ҳаракатланиш ҳамда йўловчиларни қисқа муддатда тушириш вақти 10 дақиқадан ошмайди, белгиланган вақтдан ўтиб кетса, ҳар 10 дақиқа учун тўлов ундирилади;
- Таксилар учун эстакада бепул ҳаракатланиш ҳамда йўловчиларни қисқа муддатда тушириш вақти 10 дақиқадан ошмайди, белгиланган вақтдан ўтиб кетса, ҳар 10 дақиқа учун тўлов ундирилади;
- Ўнг ва чап линияларни ажратиб турувчи сариқ чизиқни босиш тақиқланади ва уни босиш қоидабузарлик ҳисобланиб, жарима тайинланади.
Аввалроқ Uzbekistan Airports раҳбари Раънохон Жўраева компаниянинг 2021—2022 йилларга мўлжалланган реконструкция дастурини тақдим этганди. Унинг ўтказиш қобилияти 2 бараварга оширилади (соатига 600 йўловчидан 1200 йўловчига). Инвестицион фаолият, йўловчиларнинг дам олиши, умумий овқатланиш масканлари зоналари кўпайтирилади.
Эслатиб ўтамиз, 20 йилдан ортиқ (1999 йилда Тошкентда содир бўлган терактлардан сўнг) муддат давомида кутиб олувчи ва кузатувчилар пойтахт аэропортининг терминал биносига кириш имконига эга эмас ва ҳар қандай об-ҳаво шароитида ҳам ташқарида бўлишлари талаб қилинади. Халқаро аэропортда кутаётганлар учун айвон мавжуд, аммо маҳаллий авиатармоқлар терминали олдида одамлар кўчада кутишига тўғри келади.
Изоҳ (0)