Ўзбекистонда беш ой ичида содир бўлган ЙТҲлар оқибатида 770 киши ҳалок бўлди

2021 йилнинг дастлабки беш ойи давомида Ўзбекистонда 2960 та йўл-транспорт ҳодисаси қайд этилган бўлиб, улар оқибатида 770 киши ҳалок бўлган ва 2365 киши жароҳат олган. Бу ҳақда ИИВ ЙҲХББ ахборот хизматига таяниб, «Gazeta.uz» хабар берди.

Аварияларнинг энг кўпи Фарғона вилояти ҳисобига тўғри келмоқда — 458 та. Тошкент вилоятида 410 та ЙТҲ қайд этилган бўлса, Тошкент шаҳрида ушбу кўрсаткич 373 тани ташкил этган. Шунингдек, Самарқанд вилояти — 310 та, Наманган вилоятида — 303 та, Андижон вилоятида — 243 та, Қашқадарё вилояти — 171 та, Қорақалпоғистон Республикасида — 160 та, Сурхондарё вилоятида — 110 та, Бухоро вилоятида — 109 та, Навоий вилоятида — 97 та, Жиззах вилоятида — 85 та, Хоразм вилоятида — 78 та ва Сирдарё вилоятида 53 та ЙТҲ содир этилган.

Жами аварияларнинг 1249 таси пиёдалар, 396 таси — болалар, 233 таси — велосипедчилар ва 22 таси мотоцикл ҳайдовчилар иштирокида содир бўлган. ЙТҲларнинг 1070 таси шаҳар кўчаларида, 962 таси — давлат аҳамиятига эга йўлларда, 469 таси — халқаро ва яна 469 таси — маҳаллий даражадаги йўлларда қайд этилган.

Йўл-транспорт ҳодисаларининг аксарияти 28—32 ёш оралиғидаги ҳайдовчилар томонидан содир этилган — 630 та. 23—27 ёш оралиғидаги ҳайдовчилар — 595 та, 33—37 ёш — 464 та, 47 ва ундан катта ёшдагилар эса 428 та ЙТҲ содир этган. 18—22 ёш оралиғидаги ҳайдовчилар — 331 та, 38—42 ёшлилар — 292 та, 43—47 ёшлилар ҳисобида эса 220 та авария қайд этилган. Эркак ҳайдовчилар иштирокидаги ЙТҲлар сони 2894 та бўлса, аёллар иштирокидаги 66 тани ташкил этмоқда.

Йўл-транспорт ҳодисаларининг содир этилишига асосан тезликни белгиланган меъёрдан оширилиши субъектив сабаб сифатида кўрсатилмоқда — 27,7 фоиз. Қолган сабаблар орасидан устуворликка эга транспорт воситасига йўл бермасик (11,6 фоиз), ҳайдовчининг тажрибасизлиги (6,9 фоиз), автомобиль рулида ухлаб қолиш (6,3 фоиз) ва маст ҳолда автомобиль бошқариш (2,6 фоиз) ўрин олган.

ЙТҲларнинг объектив сабаби сифатида (йўлларни режалаштиришдаги камчиликлар туфайли) пиёдалар томонидан йўлнинг белгиланмаган қисмидан кесиб ўтиши — 15,4 фоиз, йўлларда йўналишларни ажратиб турувчи чизиқлар йўқлиги сабаб қарама-қарши йўналишга чиқиб кетиш (9,7 фоиз), ҳаракатни ташкиллаштиришдаги камчиликлар ва йўлларнинг носозлиги (4,6 фоиз) ҳамда велосипедда ҳаракатланиш учун жиҳозланмаган жойларда велосипедчиларни уриб юбориш (3,8 фоиз) келтирилган.

Эслатиб ўтамиз, Ўзбекистонда 2020 йилда йўл-транспорт ҳодисалари оқибатида жами 1962 киши ҳалок бўлган. Таъкидланишича, ушбу кўрсаткич 2019 йилга нисбатан 6,3 фоизга кам. Яъни 2019 йилда йўл-транспорт ҳодисалари оқибатида ҳалок бўлганлар сони 2094 нафарни ташкил этган.