Москвада меҳнат муҳожирларини коронавирусга қарши эмлаш бошланди

Москвада меҳнат муҳожирларини коронавирусга қарши бир компонентли «Спутник Лайт» вакцинаси билан эмлаш бошланди. Бу ҳақда Москва мэри Сергей Собянинга тайниб, «РБК» хабар берди.

«Биз ‘Спутник Лайт’ ёрдамида вакцинацияни ташкил этдик. Москва шаҳрининг бош давлат санитария шифокори фармони талабларига жавоб берадиган иш берувчиларнинг илтимосига биноан меҳнат муҳожирларини эмлаш бошланади», — деди Собянин.

Собянин келгусида расмийлар вакцинация схемасини соддалаштиради, дея ваъда берди. Бундан ташқари, босқичма-босқич чет эл фуқароларининг бошқа гуруҳларига, жумладан, ўз-ўзини иш билан таъминлайдиганларга эмланиш имконияти берилади.

Россиядаги чет эллик ишчилар учун эмланиш пуллик. Шаҳар мэрининг веб-сайтида хабар қилинишича, меҳнат муҳожирлари 1300 рубль (190 минг сўм) эвазига коронавирусга қарши эмланиши мумкин. Таъкидланишича, вакцинация хизматлари учун иш берувчи пул тўлайди, шунингдек, у ходимларнинг сертификатларини олади.

Расмийлар «Садовод» савдо маркази ёнида ва миграция маркази базасида муҳожирлар учун пуллик вакцинация пунктларини очишга ваъда берганди. «РИА Новости» ёзишича, ҳозирча фақат битта эмлаш пункти мавжуд, «Садовод» бозоридаги нуқта ҳали ишга туширилмаган. Россия президенти Владимир Путин меҳнат муҳожирлари учун вакцинацияни 15 июлгача ташкил қилишни буюрди.

Россияда COVID-19’га қарши эмланмаган фуқароларга чекловлар қўйиш бошланган. Россия ҳудудларида COVID-19 билан касалланишнинг ортиши фонида у ёки бу шаклда мажбурий вакцинация бошланди, асосан, хизмат кўрсатиш, савдо, соғлиқни сақлаш, транспорт ва маданият соҳалари ходимлари, шунингдек, мансабдор шахслар мажбурий эмланмоқда. Аксарият ҳудудларда ходимларнинг камида 60 фоизи қисқа муддат ичида эмланиши лозим.

Эслатиб ўтамиз, Москвада ўтган ойларда COVID-19 билан касалланиш даражаси икки бараварга ошди. Шаҳарда коронавирусга чалинганлар кўпайиб кетгани сабабли янги чекловлар киритилди. Москва ортидан Санкт-Петербург ҳам 17 июндан COVID-19 чекловларини кучайтирди.