Пойтахтдан Тошкент вилояти ҳудудига чиқувчи автобуслар ҳаракати ЙПХ пост масканигача ташкил қилинади. Бу ҳақда «Тошшартрансхизмат» АЖ матбуот хизмати хабар берди.
Фото: «Дарё» / Мадина Нурман
Маълум қилинишича, ҳозирги кунда «Тошшаҳартрансхизмат» АЖ таркибидаги автобус саройлари томонидан хизмат кўрсатилаётган 24 та автобус йўналишлари Тошкент вилоятининг турли ҳудудларигача қатновларни амалга оширади. Ушбу йўналишлар хизматларидан фойдаланувчи аксарият йўловчилар Тошкент шаҳридаги идора ва ташкилотларда меҳнат қилиши ҳамда таълим муассасаларида таҳсил олишини инобатга олиб, Тошкент вилояти ҳудудига қатновларни амалга оширувчи йўналишларнинг фаолияти ўз иш тартиби ва қатнов чизмаси асосида амалга оширишда давом этади.
Республика махсус комиссиясининг қарорига мувофиқ, Тошкент вилояти ҳудудига чиқувчи шаҳар автобус йўналишлари фаолиятига доир чекловлар жорий этилган ҳолларда бу ҳақида «Тошшаҳартрансхизмат» АЖ томонидан йўловчиларга олдиндан маълумот берилади.
«Айрим ЙПХ пост масканлари автомобиллар ҳаракати учун ёпилган ҳолларда, Тошкент вилояти ҳудудига чиқувчи автобуслар ҳаракати ЙПХ пост масканигача ташкил қилинади», — дейилади хабарда.
Аввалроқ Ўзбекистонда COVID-19’га чалиниш ҳолатлари сони кескин кўпайгани сабабли Соғлиқни сақлаш вазирлиги таклифига биноан коронавирусга қарши курашиш бўйича Республика махсус комиссияси коронавирус сабаб 28 июнидан 12 июлига қадар Тошкент шаҳрига қўшни вилоятлардан автотранспорт (автобус, автомобиль) воситалари орқали ўта зарурат бўлмаган ҳолларда кириш бўйича чекловлар ўрнатгани ҳақида хабар берилган эди.
