Moskvada mehnat muhojirlarini koronavirusga qarshi emlash boshlandi

Moskvada mehnat muhojirlarini koronavirusga qarshi bir komponentli “Sputnik Layt” vaksinasi bilan emlash boshlandi. Bu haqda Moskva meri Sergey Sobyaninga taynib, “RBK” xabar berdi.

“Biz ‘Sputnik Layt’ yordamida vaksinatsiyani tashkil etdik. Moskva shahrining bosh davlat sanitariya shifokori farmoni talablariga javob beradigan ish beruvchilarning iltimosiga binoan mehnat muhojirlarini emlash boshlanadi”, — dedi Sobyanin.

Sobyanin kelgusida rasmiylar vaksinatsiya sxemasini soddalashtiradi, deya va’da berdi. Bundan tashqari, bosqichma-bosqich chet el fuqarolarining boshqa guruhlariga, jumladan, o‘z-o‘zini ish bilan ta’minlaydiganlarga emlanish imkoniyati beriladi.

Rossiyadagi chet ellik ishchilar uchun emlanish pullik. Shahar merining veb-saytida xabar qilinishicha, mehnat muhojirlari 1300 rubl (190 ming so‘m) evaziga koronavirusga qarshi emlanishi mumkin. Ta’kidlanishicha, vaksinatsiya xizmatlari uchun ish beruvchi pul to‘laydi, shuningdek, u xodimlarning sertifikatlarini oladi.

Rasmiylar “Sadovod” savdo markazi yonida va migratsiya markazi bazasida muhojirlar uchun pullik vaksinatsiya punktlarini ochishga va’da bergandi. “RIA Novosti” yozishicha, hozircha faqat bitta emlash punkti mavjud, “Sadovod” bozoridagi nuqta hali ishga tushirilmagan. Rossiya prezidenti Vladimir Putin mehnat muhojirlari uchun vaksinatsiyani 15-iyulgacha tashkil qilishni buyurdi.

Rossiyada COVID-19’ga qarshi emlanmagan fuqarolarga cheklovlar qo‘yish boshlangan. Rossiya hududlarida COVID-19 bilan kasallanishning ortishi fonida u yoki bu shaklda majburiy vaksinatsiya boshlandi, asosan, xizmat ko‘rsatish, savdo, sog‘liqni saqlash, transport va madaniyat sohalari xodimlari, shuningdek, mansabdor shaxslar majburiy emlanmoqda. Aksariyat hududlarda xodimlarning kamida 60 foizi qisqa muddat ichida emlanishi lozim.

Eslatib o‘tamiz, Moskvada o‘tgan oylarda COVID-19 bilan kasallanish darajasi ikki baravarga oshdi. Shaharda koronavirusga chalinganlar ko‘payib ketgani sababli yangi cheklovlar kiritildi. Moskva ortidan Sankt-Peterburg ham 17-iyundan COVID-19 cheklovlarini kuchaytirdi.