Дунёда коронавирусга чалинганлар сони 181 131 203 кишига етди, шуларнинг 3 923 885 нафари вафот этган. Касалланиш ҳолатларининг кўплиги бўйича АҚШ (33,6 миллион киши), Ҳиндистон (30,2 миллион), Бразилия (18,4 миллион), Франция (5,8 миллион) ва Туркия (5,4 миллион) ҳамон етакчилик қилмоқда.
Италияда ниқоб тақиш мажбурияти бекор қилинди
Италияда бугун, 28 июндан очиқ ҳавода ниқоб тақиш шарт эмас. 21 июнь куни мамлакатда комендантлик соати бекор қилинган эди. Ўша куни Пандемияга қарши курашни назорат қилувчи илмий-техник қўмита (CTC) қарорига биноан, Италия соғлиқни сақлаш вазири Роберто Сперанза 28 июндан очиқ ҳавода ниқоб тақиш мажбурияти бекор қилинишини, аммо CTC’нинг барча кўрсатмалари сақланиб қолишини эълон қилди.
CTC вакиллари аниқлик киритишича, 28 июндан мамлакатнинг бутун ҳудуди «оқ» зонага ўтиб, барча асосий чекловлар бекор қилинди, шу жумладан, кўчада ниқоб тақиш ҳам. Агар эпидемиологик вазият ёмонлашса, ниқоб режими яна мажбурий бўлади.
Май ойида Италия ҳукумати эпидемик вазият яхшилангани сабабли карантин чораларини босқичма-босқич бекор қилишни бошлади. 21 июндан буён италияликларнинг 99 фоиздан кўпроғи «оқ» зонада қолмоқда, ушбу зонада деярли барча чекловлар бекор қилинган эди, ниқоб тақиш, ижтимоий масофани сақлаш ва оломон бўлиб тўпланмаслик мажбурияти бундан мустасно.
Мавзуга доир: Италия касалхонасидаги шифокор койкаларни бўшатиш учун COVID-19 беморларини ўлдирганликда гумонланмоқда
Люксембург бош вазири Ксаве Беттелнинг коронавирусга топширган тести ижобий чиқди. Вазир икки марта тестдан ўтган ва иккаласида ҳам инфекция аниқланган. Мамлакат Соғлиқни сақлаш вазирлигининг тавсияларига биноан, Беттел ўзини яккалаш тартибига ўтди.
RTL Today хабарига кўра, Люксембург бош вазирида коронавируснинг баъзи аломатлари, жумладан, иситма ва бош оғриғи кузатилган. Шунга қарамай, сиёсатчи уйдан ишлашда давом этишини маълум қилди.
Ксаве Беттел 6 май куни коронавирусга қарши AstraZeneca вакцинасининг биринчи компонентини олган. Иккинчи компонент унга келаси ҳафта юборилиши керак эди.
Сиёсатчи инфекцияга чалингани ҳақида Европа Иттифоқи саммитидаги иштирокидан кўп ўтмай хабардор бўлди. Бироқ, Беттелнинг вакили таъкидлашича, вазир барча эҳтиёт чораларини кўрган ва яқиндан мулоқот қилганлари рўйхатида учрашув иштирокчиларининг бирортаси йўқ.
Мавзуга доир: Қирғизистон соғлиқни сақлаш вазири Хитой вакцинаси билан эмланганидан кейин коронавирусга чалинди
Саудия Арабистони ҳукумати 12 ёшдан 18 ёшгача бўлган гуруҳдаги аҳолининг бир қисмини эмлашга қарор қилди. Ўсмирлар Германиянинг BioNTech биотехнология компанияси ва Американинг Pfizer компанияси биргаликда ишлаб чиқарган вакцина билан эмланади.
Соғлиқни сақлаш вазирлигининг маълумотларига кўра, ушбу қарор мазкур ёш гуруҳи учун танланган препарат озиқ-овқат ва фармацевтика идораси тасдиғидан ўтганидан сўнг қабул қилинган.
Шу билан бирга, Ички ишлар вазирлигининг расмий вакили подполковник Талал аш-Шалхубнинг таъкидлашича, 1 августдан Саудия Арабистони ҳукумати эмланмаганлар учун ишга кириш ва турли тадбирларни ўтказишни тақиқлайди.
«Тижорий, маданий, кўнгилочар, спорт, иқтисодий, илмий, ижтимоий ва бошқа тадбирларда қатнашадиганлар COVID-19’га қарши эмланиши шарт», — деди расмий. Унинг таъкидлашича, қоидабузарларга 40 минг Саудия риёли (10 минг доллардан ортиқ) миқдорида жарима солинади.
Мавзуга доир: Саудия Арабистонида COVID-19 ҳақида ёлғон маълумот тарқатганлар 266 минг доллар жарима тўлайди
Индонезияда ўтган бир кеча-кундузда 21 мингдан ортиқ кишида COVID-19 қайд этилди, бу мамлакат учун янги антирекорд. Мамлакатда пандемия бошидан бери жами 2,1 миллиондан ортиқ кишида инфекция аниқланган, 57 138 бемор COVID-19 оқибатида вафот этган. Шу билан бирга, ҳақиқий рақамлар анча юқори деб ҳисобланмоқда, чунки COVID-тестларнинг кичик кўлами туфайли Индонезияда вирус юқтириш бўйича кўплаб ҳолатлар расмий статистикага киритилмаган.
Индонезия ҳукумати касалланиш ҳолатининг ортиши фонида касалхоналар беморлар оқимига ортиқ дош беролмаслигидан хавотирда. Шу билан бирга, маҳаллий мутахассислар коронавируснинг ушбу тўлқини икки-уч ҳафта ичида чўққисига чиқиши мумкинлигини айтмоқда
Мавзуга доир: Индонезияда ниқоб тақмасдан юрган эркаклар коронавирусдан вафот этганлар учун қабр қазишга юборилмоқда
Жанубий Африка Республикаси(ЖАР)да коронавирусининг янги — дельта тури тарқалиши сабабли карантин чоралари кучайтирилди, мамлакат тўртинчи даражали хавф ҳудудига айланмоқда.
«Барча йиғинлар — хоҳ очиқ, хоҳ ёпиқ жойда бўлмасин, тақиқланади. Бу диний, сиёсий, маданий ва ижтимоий учрашувларни ҳам ўз ичига олади », — деди мамлакат президенти Сирил Рамафоса.
Мамлакат бўйлаб дафн маросимида қатнашувчилар сони 50 кишигача этиб чекланади. Шу билан бирга, дафн маросимидан кейинги ҳар қандай йиғин тақиқланади. Барча иш берувчилар, агар иш жойида бўлишнинг ҳожати бўлмаса, ўз ходимларига уйдан ишлашга рухсат бериши керак. Ишдан ташқарида фақат оила аъзолари билан учрашиш мумкин бўлади.
Ресторан ва бошқа овқатланиш корхоналари фақат олиб кетиш ёки етказиб бериш учун ишлаши мумкин. Бундан ташқари, мамлакатда соат 21:00 дан 04:00 гача комендантлик соати жорий этилган. Фақат тегишли рухсатномага эга бўлган ходимлар бу вақтда кўчага чиқиши мумкин. Спиртли ичимликларни сотиш тақиқланади.
Ушбу тадбирларнинг барчаси 28 июндан 11 июлгача амал қилади. Бундан ташқари, 30 июндан бошлаб мамлакатдаги барча мактаблар ёпилади.
Изоҳ (0)