Туркия вице-президенти Фуат Октай шу ҳафта Ўзбекистонга ташриф буюради. Бу ҳақда Инвестициялар ва ташқи савдо вазирлиги хабар берди.
Маълум қилинишича, 25 июнь куни бош вазир ўринбосари – инвестициялар ва ташқи савдо вазири Сардор Умурзоқов Туркиянинг Ўзбекистондаги элчиси Олган Бекарни қабул қилган.
Суҳбат давомида икки томонлама савдо-иқтисодий, инвестициявий, транспорт ва логистика, маданий-гуманитар ҳамкорликнинг бугунги ҳолати ва истиқболлари муҳокама қилинган.
Шунингдек, Туркия вице-президенти Фуат Октайнинг Ўзбекистонга ташрифига тайёргарлик кўриш масалалари муҳокама қилинган. Ташриф доирасида Ўзбекистон ва Туркия ўртасидаги Савдо-иқтисодий ҳамкорлик бўйича ҳукуматлараро комиссиянинг 6-йиғилиши ҳамда ўзбек-турк бизнес-форуми ўтказилиши режалаштирилган.
Ушбу тадбирлар доирасида икки томонлама ҳужжатларнинг йирик тўпламини имзолаш режалаштирилгани ва уларнинг амалда жорий этилиши Ўзбекистон—Туркия муносабатларининг янада ривожланишига янги туртки бериши таъкидланган.
Эслатиб ўтамиз, 2021 йилнинг мартида Туркия ташқи ишлар вазири Мевлут Чавушўғли бошчилигидаги делегация Урганчга келганди.
Изоҳ (0)