Кувайт халқаро аэропортида 27 июнь куни Ўзбекистоннинг Кувайтдаги элчихонаси вакиллари иштирокида Jazeera Airways авиакомпаниясининг Кувайт—Тошкент йўналиши бўйича биринчи рейсининг очилиш маросими ўтказилди, деб хабар бермоқда «Дунё» АА.
Унда Кувайт авиация маъмурияти расмийлари, Jazeera Airways раҳбарияти, ишбилармон доиралар, сайёҳлик агентликлари ва қабул қилувчи мамлакат оммавий ахборот воситалари вакиллари иштирок этди.
Jazeera Airways бош директори Роҳит Рамачандран ўз нутқида Кувайт ва Ўзбекистон пойтахтлари ўртасида тўғридан-тўғри рейсларни очиш муҳимлигини таъкидлади.
«Биз Кувайт халқаро аэропортидан Ўзбекистон пойтахтига тўғридан-тўғри рейсни очганимиздан мамнунмиз. Бой тарихга эга ушбу мамлакат нафақат кувайтликлар, балки минтақадаги бошқа мамлакатлар фуқаролари учун ҳам энг оммабоп йўналишлардан бири ҳисобланади. Мунтазам қатновларнинг ташкил этилиши икки мамлакат халқлари ўртасидаги алоқаларни мустаҳкамлашга, Ўзбекистонга сайёҳлар оқимини кўпайтиришга, икки давлат ўртасидаги савдо-иқтисодий ва маданий-гуманитар ҳамкорликни ривожлантиришга ёрдам беришига ишончим комил», — деган у.
Spot’нинг Кувайт ахборот агентлиги (KUNA)га таяниб маълум қилишича, парвозлар А320-214 ва А320-251N самолётларида сешанба ва шанба кунлари амалга оширилади.
Эслатиб ўтамиз, Кувайтнинг Jazeera Airways авиакомпанияси Ўзбекистонга мунтазам қатновларни амалга ошириш учун 2021 йил апрелида рухсатнома олганди.
Изоҳ (0)