“Katta yettilik” (G7) davlatlari sammitining birinchi kuni, asosan, Rossiya va Xitoy muhokamasiga bag‘ishlandi. Ushbu ikki mamlakatning har biri ustidagi bahslarga bir yarim soatdan vaqt ketdi. Bu haqda AQSh davlat departamenti vakiliga tayanib, “RBK” xabar berdi.
Foto: “Vesti”
“Xitoy haqida bir yarim soatlik bahs bo‘lib o‘tdi, so‘ngra Myanma, Liviya, Suriya bo‘yicha 30 daqiqalik kichik sessiyalar bo‘ldi. Rossiya, xususan, uning Ukraina va Belarusga qarshi kurashi haqida bir soat-u 30 daqiqa, Afg‘oniston masalasida 30 daqiqa muhokama olib borildi ”, — dedi departament vakili.
Shu bilan G7 davlatlari tashqi ishlar vazirlarining yalpi majlis yakunlandi. Vazirlar uchrashuvini 5-may kuni davom ettiradi.
Davlat departamenti vakili ta’kidlashicha, sammitning birinchi kunida Xitoy bosh mavzu bo‘ldi.
“Biz hammamiz Xitoy xalqaro tartibning ajralmas a’zosi bo‘lishini istaymiz. Buni amalga oshirish uchun u ushbu xalqaro tartib qoidalariga amal qilishi kerakligi to‘g‘risida keng qamrovli kelishuv mavjud edi”, — dedi AQSh departamenti.
Rossiya haqidagi muhokamada Amerika Rossiya bilan barqaror va oldindan aytib bo‘ladigan munosabatlarni istashini, ammo uning “mulohazasiz va tajovuzkor xatti-harakatlarga” javob qaytarishini aytdi. Davlat departamenti, shuningdek, uchrashuvda barcha tashqi ishlar vazirlari Kiyevga “Rossiya tajovuziga qarshi” birdamlik bildirganini ta’kidladi.
Avvalroq G7 davlatlari va Yevropa komissiyasi Rossiya qo‘shinlarining Ukraina chegarasi va Qrimda to‘planganidan xavotir bildirib, Rossiyani ushbu “provokatsiyalarni to‘xtatishga” chaqirgan edi.
Ular shuningdek, Rossiyaga Yevropa Xavfsizlik va hamkorlik tashkiloti prinsiplarini eslatgan va uni harbiy kuchlar harakatining shaffofligi bo‘yicha o‘z majburiyatlarini bajarishga chaqirgan.
Ular Minsk kelishuvlarining amalga oshirilishini Ukraina sharqidagi mojaroni siyosiy yo‘l bilan hal qilishning yagona yo‘li deb atagan.
G7 — global muammolarni muhokama qiladigan norasmiy tashkilot. Uning tarkibiga yettita davlat kiradi: Buyuk Britaniya, Germaniya, Italiya, Kanada, AQSh, Fransiya va Yaponiya. 2014-yilgacha Rossiya ham guruhning a’zosi bo‘lgan.
