Германиянинг Вюрсбург шаҳри марказида 25 июнь куни кечқурун номаълум шахс ўткинчиларга пичоқ билан ҳужум қилди. Бу ҳақда маҳаллий Main Post газетаси хабар берди.
Нашрнинг полициядаги манбаларига таяниб, хабар беришича, ҳужум оқибатида уч киши ҳалок бўлган, камида олти киши жароҳатланган — улар касалхоналарга ётқизилган.
Полиция ҳужумчига қарата ўқ узганини ва эркакни ҳибсга олганини маълум қилди. Бунга қадар аҳолининг ўзи уни тўхтатишга уринган. Оёғидан ўқ еган ҳужумчи ҳозир ҳибсда. Ҳуқуқ-тартибот идоралари катта эҳтимол билан тажовузкорнинг ёлғиз ҳаракатланганини хабар қилди.
Айни пайтда воқеа жойи хавфсизлик кучлари томонидан ўраб олинган, аммо полиция аҳолига ҳеч қандай таҳдид йўқлигини айтмоқда. Кўчаларда тез ёрдам машиналари ва полиция тўпланган.
Аввалроқ Хитойда номаълум шахс пичоқ билан болалар боғчасига ҳужум қилиб, 16 нафар бола ва 2 тарбиячини яралаган эди. Шунингдек, Грузияда қуролланган шахс банкка бостириб кириб, одамларни гаровга олгани ҳақида хабар берилган.
2 апрель куни эса АҚШ Конгресси биноси яқинидаги назорат пунктига автомобиль келиб урилганди. Ҳайдовчи машинадан сакраб тушиб, пичоқ билан икки полициячига ҳужум қилган, оқибатда полициячилардан бири ҳалок бўлган.
Изоҳ (0)