Лондонда «бир неча дақиқалик» торнадо ўзидан катта талафот қолдирди (видео)

Лондоннинг шарқий қисмига 25 июнь, жума оқшомида кучли торнадо ёғилди. Ҳодиса узоқ давом этмаган, аммо ўзидан кўплаб талафотлар қолдирган, деб ёзади Sky News.

Лондон полициясига жума куни кечқурун соат 19:20 (Тошкент вақти билан 15:20) атрофида Баркинг туманидаги бир неча кўчаларни торнадо босиб ўтгани ҳақида хабар келиб тушди. Табиий офат тўсиқлар ва деворларни вайрон қилиб, машиналарни шикастлаган.

Гувоҳларнинг хабар беришича, соат 19:15 да тўсатдан кучли шамол эсган. Довул панжара устунларини йиқитган, чиқиндиларни уйган ва уларни «торнадо каби айлантириб» кўтарган.

«Чиқинди ва полиэтилен пакетлар торнадо каби айланарди. Бу даҳшатли эди, чунки оғир нарсалар ҳам ҳавога кўтарилди. Ваҳимага тушдим, уй қулаб тушади деб ўйладим», — дея воқеани тасвирлаган туман аҳолиси ижтимоий тармоқларда.

Энг қизиғи, деб ёзади нашр, барчаси «бир неча дақиқада» тугаган, аммо олти-еттита кўчага зарар етказиш учун шунинг ўзи кифоя қилган: уйларнинг томи бузилган, дераза ойналари синган, кўплаб автомобилларга зарар етган.

Бир неча дақиқадан сўнг воқеа жойига фавқулодда хизматлар етиб келган. Ҳодисадан ҳеч ким жароҳат олмаган. Ҳаммаси шу қадар тез содир бўлганидан полиция бу торнадо ёки бошқа табиий ҳодиса эканлигини тасдиқлай олмайди.

«19:20 атрофида полицияга Халс-авеню ва Баркинг ҳудудидаги баъзи йўлларда томлар, электр жиҳозлари бузилгани, транспорт воситаларининг шикастлангани тўғрисидаги хабар билан мурожаат қилинди. Бу об-ҳаво билан боғлиқ бўлиб, ҳодиса пайтида чақмоқ уриши юз берган. Биз торнадо ҳақида хабарларни кўрдик, аммо буни тасдиқлай олмаймиз», — дейилади полиция баёнотида.

Полиция, шунингдек, қурбонлар ҳақида ҳеч қандай маълумот йўқлигини қўшимча қилди.

https://twitter.com/1mrano/status/1408506350896812036

https://twitter.com/1mrano/status/1408502819234140160

https://twitter.com/1mrano/status/1408502373010583554