Афроамерикалик Жорж Флойдни ўлдиришда айбдор деб топилган собиқ полициячи Дерек Шовин 22,5 йилга озодликдан маҳрум қилинди

АҚШда Миннеаполис шаҳар полициясининг собиқ ходими Дерек Шовин қора танли Жорж Флойднинг ўлимида айбдор деб топилганидан сўнг 22,5 йилга озодликдан маҳрум қилинди. Бу ҳақда Reuters хабар берди.

Полициячи афроамерикаликни 2020 йилнинг май ойида ҳибсга олиш чоғида ўлдирганди. Қўлга олиш пайтида Дерек Шовин тиззаси билан Флойднинг бўйнини босиб, саккиз дақиқача шу ҳолатда турган, афроамерикалик нафас ололмаётгани ҳақида бир неча марта айтгани кор қилмаган.

Бунинг ортидан мамлакат бўйлаб ҳуқуқ-тартибот органлари шафқатсизлиги ва ирқий тенгсизликка қарши оммавий норозилик намойишлари авж олди ва Black Lives Matter («Қора танлиларнинг ҳаёти муҳим») ҳаракати пайдо бўлди.

Собиқ полициячининг суд жараёни март ойининг охирида бошланди. Апрель ойида ҳакамлар ҳайъати Шовинни учта банд бўйича айбдор деб топди: қасддан содир этилмаган иккинчи даражали қотиллик (оғирлаштирувчи ҳолатларсиз), эҳтиётсизликдан одам ўлдириш ва инсон ҳаётига нисбатан бехосдан ўлимга олиб келадиган қўпол ҳурматсизлик.

Прокуратура Шовинни 30 йилга озодликдан маҳрум қилишни сўраган, улар Флойдни ҳибсга олишда полициячи томонидан қўлланилган усул ўлимга олиб келганини таъкидлади. Адвокатлар, ўз навбатида, Флойд полициячининг хатти-ҳаракати туфайли эмас, балки соғлиғи ва гиёҳванд моддаларни истеъмол қилгани сабабли вафот этганини даъво қилди.

25 июнь куни бўлиб ўтган суд мажлисида Шовин Флойднинг оиласига ҳамдардлик билдирди ва у ҳуқуқий масалалар ҳал қилинмагани сабабли тўлиқ баёнот бера олмаслигини айтди.

Шовинга ўқилган ҳукмдан хабар топган АҚШ президенти Жо Байден: «Мен кўриб чиқилган барча ҳолатларни билмайман, лекин фикримча, кўрсатмаларга мувофиқ, бу (ҳукм) ўринли кўринади», — деди.

Шовин билан бирга Флойдни ҳибсга олишда иштирок этган яна уч полициячи ҳуқуқ-тартибот органларидан четлаштирилди. Улар 2022 йил март ойида суд олдида жавоб беради.