Россиянинг «Вимпелком» телекоммуникация компанияси VEON ва «Ўзбектелеком»нинг ўртасидаги қўшма корхона — Buzton провайдерининг 55,37 фоизини сотиб олди. Бу ҳақда «Коммерсантъ» нашрига таяниб, Spot хабар берди.
2021 йилнинг май охирларида ўткзилган компания акциядорлари йиғилишида VEON Uzb номи остида шўъба тузилмасини яратиш бўйича қарор қабул қилинган.
Вазиятдан хабардор нашр манбасининг таъкидлашича, VEON Ўзбекистондаги активларини ўзгартириш орқали Россиядаги бизнеси билан бирга уни сотишни мақсад қилган (компания Ўзбекистонда ҳам, Россияда ҳам Beeline бренди остида фаолият кўрсатади).
Нашрнинг экспертларга таяниб ёзишича, сўнгги йилларда Beeline Uzbekistan пул ва мижозларини йўқотмоқда. Активларнинг Россия юрисдиксиясига топширилиши VEON’га кўрсаткичларни яхшилашга ёрдам бериши мумкин.
Маълумот учун, Buzton — Ўзбекистонда илк провайдерлардан бири бўлиб, унга 1995 йилда асос солинган. 2008 йилдан бошлаб у симли интернет ва телефония хизматларини Beeline бренди остида кўрсатишни бошлаган.
Эслатиб ўтамиз, март ойида VEON компанияси Арташес Давтян 2021 йил 15 мартдан Beeline Uzbekistan бош директорлиги лавозимига тайинланганини эълон қилганди. Бироқ холдингнинг маълум қилишича, ишни қабул қилиб олиш жараёнини якунлашнинг имкони бўлмаган ва кейинроқ Анжей Малиновский Beeline Uzbekistan бош директори этиб тайинланганди.
Изоҳ (0)