Rossiyaning “Vimpelkom” telekommunikatsiya kompaniyasi VEON va “O‘zbektelekom”ning o‘rtasidagi qo‘shma korxona — Buzton provayderining 55,37 foizini sotib oldi. Bu haqda “Kommersant” nashriga tayanib, Spot xabar berdi.
2021-yilning may oxirlarida o‘tkzilgan kompaniya aksiyadorlari yig‘ilishida VEON Uzb nomi ostida sho‘ba tuzilmasini yaratish bo‘yicha qaror qabul qilingan.
Vaziyatdan xabardor nashr manbasining ta’kidlashicha, VEON O‘zbekistondagi aktivlarini o‘zgartirish orqali Rossiyadagi biznesi bilan birga uni sotishni maqsad qilgan (kompaniya O‘zbekistonda ham, Rossiyada ham Beeline brendi ostida faoliyat ko‘rsatadi).
Nashrning ekspertlarga tayanib yozishicha, so‘nggi yillarda Beeline Uzbekistan pul va mijozlarini yo‘qotmoqda. Aktivlarning Rossiya yurisdiksiyasiga topshirilishi VEON’ga ko‘rsatkichlarni yaxshilashga yordam berishi mumkin.
Ma’lumot uchun, Buzton — O‘zbekistonda ilk provayderlardan biri bo‘lib, unga 1995-yilda asos solingan. 2008-yildan boshlab u simli internet va telefoniya xizmatlarini Beeline brendi ostida ko‘rsatishni boshlagan.
Eslatib o‘tamiz, mart oyida VEON kompaniyasi Artashes Davtyan 2021-yil 15-martdan Beeline Uzbekistan bosh direktorligi lavozimiga tayinlanganini e’lon qilgandi. Biroq xoldingning ma’lum qilishicha, ishni qabul qilib olish jarayonini yakunlashning imkoni bo‘lmagan va keyinroq Anjey Malinovskiy Beeline Uzbekistan bosh direktori etib tayinlangandi.
Izoh (0)