Шифокор Азизбек Болтаев Ўзбекистон яқин ойларда 2020 йилнинг ёзидаги каби даҳшатни бошдан кечириши мумкинлигини айтганди. Коронавирусга қарши курашиш штаби аъзоси, Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов 24 июнь куни ўтказилган брифингда шифокор айтган гапларга муносабат билдирди.
«Шифокор Азизбек Болтаев республикада олиб борилаётган тадбирлар тўғрисида керекли вазирлик ва идоралар ёки ташкилотлар билан суҳбатлашмагани, музокаралар олиб бормагани яққол сезилиб турибди», — дейди Ботир Қурбонов.
Унинг таъкидлашича, республикада 2020 йил 15 мартда касаллик биринчи марта қайд этилган бўлса, бугунги кунда мамлакатнинг барча маъмурий ҳудудларида ушбу касалликка қарши курашиш тадбирлари, яъни касаллик келиб чиқиши, унинг юқиш омили, касалликка қарши курашиш тадбирларининг ҳудудлар кесимида ўзига хос шаклланиши доимий равишда ўрганиб келинмоқда.
Азизбек Болтаев Ўзбекистонда коронавирус билан касалланиш ортиши янги йилга тўғри келади деб тахмин қилганини, аммо бу ҳозир юз бераётганини айтиб, бунга бемор коронавирусга чалинганидан кейин унда 7 ойгача вирусга қарши иммунитет пайдо бўлиб, кейин қонда антитаналар миқдори кескин камайиб, қайта касалланиш хавфи ортишини сабаб қилиб кўрсатганди.
«Биолог сифатида, мана шу касалликка қарши 2 йилдан бери ишлаб келаётган Коронавирусга қарши кураш штаби аъзоси сифатида 7 ой муддат асоссиз ёзилган, деб бемалол айта оламан. Чунки антитаналар пайдо бўлиши, уларнинг қанча муддат сақланиши фақат Ўзбекистонда эмас, ўйлайманки, бутун дунёда ўрганилмоқда. Ҳеч қайси илмий текшириш институти ёки илмий марказ томонидан аниқ, илмий асосланган исбот ҳозирги кунгача йўқ», — дейди Ботир Қурбонов.
Унинг сўзларига кўра, бу жараён ҳар бир кишида индивидуал кечмоқда. Бутун дунё олимлари буни кузатмоқда ва илмий изланишлар давом этмоқда. Ўзбекистонда ҳам бугунги кунда бир неча ўнлаб олимлар томонидан коронавирусга қарши илмий изланишлар олиб борилмоқда.
Ўзбекистонда 2020 йилдан бошлаб касалликдан кейинги иммунитет шаклланиши ССВ, хусусан, Вирусология илмий-текшириш институти томонидан ўрганилган бўлиб, 2020 йилнинг 27 августидан 11 сентябригача ушбу антитаналарнинг пайдо бўлиши ва сақланиши республикадаги 86 879 кишида ўрганилган. Уларнинг 23 фоизида, яъни 19 869 нафарида антитаналар шаклланганлиги кўриб чиқилган. Ушбу антитаначалар аниқланган вилоятларда 38 фоизгача жамоавий иммунитет шаклланганлиги, айрим вилоятларда ушбу кўрсаткич пастлиги ёки 5 фоизгача шаклланганлиги қайд этилган.
«Ушбу касалликдан кейинги иммунитет шаклланиши ва унинг йўқ бўлиб кетиши барча илмий текшириш институтлари учун, қолаверса, вакцина ишлаб чиқарувчилар учун мавҳумлигича қолмоқда», — деган Коронавирусга қарши курашиш штаби аъзоси.
Азизбек Болтаев бутун дунё мамлакатлари каби Ўзбекистон ҳам шошилинч равишда аҳолини коронавирусга қарши эмлаши кераклигини, мамлакат бу борада бошқа мамлакатлардан ортда қолаётганини айтганди.
Бунга жавобан Ботир Қурбонов Ўзбекистонда коронавирусга қарши эмлаш 2020 йилдан бошлангани ва у босқичма-босқич амалга оширилиб келинаётганини, 3,5 миллиондан ортиқ шахс вакцина билан эмланганини таъкидлади (ССВ маълумотларида 22 июнь ҳолатига кўра мамлакатда жами эмланганлар сони 1 784 553 кишини ташкил этмоқда).
Азизбек Болтаев коронавирус бўйича ҳукумат комиссияси бошчилигидаги Соғлиқни сақлаш вазирлигига пандемияга қарши чораларни ёмон ташкил этгани, ўтган йилги қийинчиликлардан тегишли хулоса чиқармагани, шунингдек, вакцинация кампаниясини очиқчасига заиф ташкиллаштираётгани учун икки баҳо берилиши кераклигини ҳам айтганди.
Коронавирусга қарши курашиш штаби аъзосининг сўзларига кўра, май ойида 1037 та эмлаш пунктида 3 035 784 доза вакцина билан аҳоли қабраб олинган (ССВ маълумотларида 22 июнь ҳолатига кўра шунча дозадан фойдаланилгани қайд этилган). Июнь ойининг бошларида эса эмлаш пунтклари 1883 тага ортиши ва бир ойда аҳолини 1,2 миллионта доза билан эмлаш кўзда тутилган.
Ботир Қурбоновнинг маълум қилишича, бугунги кунда хавф гуруҳига кирувчи аҳолининг вакцинация билан қамраб олинганлик даражаси қуйидагича:- 65 ёш ва ундан катталар — 37 фоиз;
- тиббиёт ходимлари — 96 фоиз;
- умумтаълим мактаби ўқитувчилари — 61,5 фоиз;
- мактабгача таълим ташкилотлари ходимлари — 67 фоиз;
- сурункали касалликлари бор кишилар — 40 фоиз;
- ҳуқуқни муҳофаза қилувчи органлар ходимлари — 60 фоиз.
«Йил охиригача ваъда қилганимиздек, 20 фоиз аҳолининг эмланишини ташкил қилиш ва бунинг учун етакчи вакцина ишлаб чиқарувчи ташкилотлар, корхоналар билан музокаралар олиб борилиши ва тегишли хулосалар чиқарилиши олдимизда қўйилган вазифамиздир», — деган Ботир Қурбонов ва Коронавирусга қарши махсус комиссия иши тўғри ташкил этилмаганида Ўзбекистонда ҳам бошқа давлатлар, хусусан, АҚШ, Германия, Буюк Британия ва Россия қатори мамлакатларда коронавирус билан бўлиқ вазият ҳозирги ҳолатидан бирмунча ёмонроқ бўлиши мумкинлигини ҳам айтиб ўтган.
Мавзуга доир:
Изоҳ (0)