O‘zbekistondagi emlash tadbirlarida foydalaniladigan zaruriy sarflovchi vositalarni xarid qilish uchun 6 mlrd 782 million 300 ming so‘m mablag‘ ajratilgan. Bu haqda AOKAda o‘tkazilgan matbuot anjumanida Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonov ma’lum qildi.
Foto: “Daryo”
Qayd etilishicha, Sog‘liqni saqlash vazirligi buyrug‘iga ko‘ra, emlash tadbirlarning bajarilishi Sanitariya-epidemiologiya xizmatida tashkil etilgan shtab tomonidan doimiy nazorat qilinib, muvofiqlashtirish tadbirlari olib borilmoqda.
Emlash jarayonida 4356 nafar shifokor qatnashmoqda.
GAVI (Global Alliance on Vaaccination and Immunization) xalqaro tashkilotining sog‘liqni saqlash tizimini mustahkamlash dasturi doirasida 17 ta avtorefrijerator, 206 ta yuk tashuvchi miniven, 16 ta yengil avtotransport vositasi qabul qilinib, emlash jarayonida faol ishlatilmoqda.
Emlash jarayonida qatnashayotgan 4356 nafar shifokor hamda 11 539 nafar o‘rta tibbiyot xodimi “Xavfsiz immunizatsiya” dasturi bo‘yicha o‘qitilgan.
Eslatib o‘tamiz, O‘zbekistonda koronavirusga qarshi qo‘llanilgan vaksinalar soni 2,5 mln dozadan oshdi. 23-maydan o‘zbek—xitoy vaksinasi bilan emlanganlarga 3-dozani qo‘llash boshlandi.
Ma’lumot uchun, O‘zbekistonning vaksina zaxirasi 5,4 million dozaga yetdi. 10-iyun kuni ZF-UZ-VAC2001 vaksinasining million dozadan iborat 5-partiyasi, shuningdek, “Sputnik V” vaksinasining 70 ming dozalik 2-komponenti olib kelingandi.
