Бразилияда кузатилаётган совуқ об-ҳаво савдогарлар орасида жорий ва келгуси йилги ҳосил бўйича хавотирларни кучайтирди. Шу боис арабика қаҳвасининг нархи июнь ойидан бери рекорд даражада кўтарилмоқда. Бу ҳақда маҳаллий нашрларга таяниб, РБК хабар берди.

Қаҳва нархлари 2024 йилда қарийб 70 фоизга ошган бўлса, 2025 йилнинг шу давригача яна 8 фоизга кўтарилиш қайд этилган. Маълумотларга кўра, 2025 йил 19 август куни арабика қаҳвасининг декабрь фьючерслари 3,32 фоизга қимматлашиб, бир килограм қаҳва 7,63 долларни ташкил қилган.
Нархлар 6 кундан буён узлуксиз ошиб келмоқда: 13 августдан бошлаб қаҳва нархи 12,62 фоизга кўтарилган. Бу, 2025 йил апрелидан буён кузатилган энг узоқ ўсиш бўлди. McDougall Global View таҳлилчиси Майкл Макдугаллнинг таъкидлашича, гап нафақат жорий ҳосил ҳақида, балки 2026 йилги ҳосилнинг ҳам камайиш эҳтимоли ҳақида бормоқда.
“Совуқ эрта гуллашни кучайтириб, дарахтларга ортиқча босим ўтказмоқда”, деди у.
“Sucden Financial” компанияси брокери Гарри Ховард эса сўнгги кунлардаги нархларнинг ошишини Бразилиядан экспортнинг кутилганидан секинроқ суръатларда ўсиши билан изоҳламоқда. Унга кўра, Сол де Минас ва Керрадо минтақаларида кузатилган совуқ ҳам нархларга тасир ўтказган.
Шунингдек, Вьетнамда ҳам қаҳва таъминотига хавф солувчи муаммолар юзага келмоқда. Мамлакатдаги асосий етиштириш ҳудудларидан бирида қурғоқчилик кузатилган бўлса, йиғим-терим мавсуми бошланишида кучли ёмғир ёғган.
Бразилия дунёдаги энг йирик қаҳва етиштирувчиси ва экспортчиси саналади. 2025/26 йил мавсумида мамлакатда қарийб 65 миллион қоп (тахминан 3,9 млн тонна) қаҳва етиштирилиши кутилмоқда. Ҳосилнинг катта қисми арабика, қолган қисми робуста турига тўғри келади.
Экспорт бўйича 2024 йил Бразилия учун рекорд бўлди — йил якунида 50,4 миллион қоп (тахминан 3,0 млн тонна) қаҳва сотилган. 2024/25 йилда экспорт 44,25 миллион қоп (2,7 млн тонна) атрофида бўлган, 2025/26 йилда эса 41–42 миллион қоп (≈ 2,5 млн тонна) бўлиши тахмин қилинмоқда. Импорт ҳақида гап кетганда, Бразилия ички эҳтиёжини асосан ўзи таъминлайди. Фақат оз миқдорда қовурилган қаҳва Швейцария, Франция ва Италиядан олиб кирилади.
Шу билан бир қаторда Бразилия Ўзбекистонга ҳам қаҳва етказиб беради. Хусусан, 2025 йилнинг январь июнь ойларида Ўзбекистон 36 та хорижий давлатлардан қиймати 3,9 миллион долларига тенг бўлган 431 тонна кофе импорт қилган. Уларнинг ичида Бразилия 81 тонна билан иккинчи ўринда турибди.
Изоҳ (0)