The Washington Post газетаси журналисти Жамол Қошиқчининг ўлдириб кетилишига алоқадор бўлган тўрт нафар Саудия Арабистони фуқароси бир йил олдин АҚШда жанговар тайёргарликдан ўтган. Бу ҳақда The New York Times хабар берди.
Нашрнинг таъкидлашича, 2017 йилда Арканзас штатидаги Tier 1 Group хавфсизлик компанияси саудияликларни АҚШ Давлат департаменти томонидан тасдиқланган шартнома асосида ўқитган. Ўқув дастур «хавфсиз ўқ отиш» ва «қарши ҳужум» машқларини, шунингдек, ташқи кузатув ва яқиндан жанг қилишни ўз ичига олган.
Компания машғулотлар мудофаа хусусиятига эга эканини ва Саудия Арабистони раҳбарлари ҳимоясини яхшилашга қаратилганини таъкидлади.
NYT таъкидлашича, компания АҚШ ҳукумати ёки Tier 1 Group маъмурияти саудияликлар ўз мамлакатидаги репрессияларда қатнашмоқчилигидан хабардор бўлгани тўғрисида маълумот ва далилларга эга эмас. «Ўтказилган машғулотлар уларнинг кейинги жирканч ҳаракатларига ҳеч қанақасига алоқадор бўлмаган», — деди компания вакили газетага жавобан.
Эслатиб ўтамиз, Жамол Қошиқчи The Washington Post журналисти бўлган ва ўз мақолаларида Саудия Арабистони ҳукуматини танқид қилган. У 2018 йилнинг октябрь ойида Саудия Арабистонининг Истанбулдаги элчихонасида боши танасидан жудо қилиниб ўлдирилган. Унинг жасади ҳозиргача топилмаган.
Туркия ҳукумати, АҚШ Сенати ва Марказий разведка бошқармаси журналистни ўлдириш ҳақидаги буйруқни Саудия Арабистонининг меросхўр шаҳзодаси Муҳаммад ибн Салмон берганлигини маълум қилган. Саудия Арабистони ҳукумати эса журналистнинг ўлимини куч тузилмаларининг шахсий ташаббуси деб атаган.
Жиноятда гумонланганлар Саудия Арабистони судига топширилган. 2019 йилнинг декабрь ойида уларнинг беш нафари ўлим жазосига ҳукм қилинган, яна уч нафарига тайинланган қамоқ жазосининг умумий муддати 24 йилни ташкил этган.
2020 йилнинг сентябрида беш кишига тайинланган ўлим жазоси журналистнинг ўғиллари сўровига асосан қамоқ жазосига алмаштирилган. 2020 йилнинг май ойида журналистнинг ўғиллари отасининг ўлимида айбдор бўлганларни кечиришини маълум қилган. Бироқ журналистнинг дўсти Қошиқчининг ўғиллари айбдорларни кечириш ҳақида ўз ихтиёри билан маълум қилганига шубҳа билдирган.
26 февраль куни АҚШ Миллий разведкаси Саудия Арабистони валиаҳд шаҳзодаси Муҳаммад бин Салмон ас-Сауд саудиялик журналист Жамол Қошиқчини ўғирлаш ёки ўлдириш бўйича операцияни қўллаб-қувватлашда айбланган ҳисоботини эълон қилган.
Аввалроқ Қошиқчининг ўлдирилиши тўғрисидаги ҳужжатдан уч кишининг исми сирли равишда ғойиб бўлгани ҳақида хабар берилган.
Изоҳ (0)