Ўзбекистон ва Россия ҳукумати раҳбарлари ўртасида учрашув ўтказилди, дея хабар бермоқда Россия ҳукумати матбуот хизмати.
Бош вазир Абдулла Арипов россиялик ҳамкасби Михаил Мишустинга икки давлат ўртасида мунтазам авиарейсларни оширишга қарор қилингани учун миннатдорлик билдирди ва ушбу йўналишда ўзаро қатновлар сонини карантин талабларига риоя қилган ҳолда ҳафтасига 14 тагача оширишни таклиф қилди. Шунингдек, талабгир йўналишларда босқичма-босқич темир йўл қатновини тиклашни илгари сурди.
Абдулла Арипов Мозори-Шариф–Қобул–Пешовар темир йўл коридори қурилишига рус компаниялари қизиқиш билдираётгани муҳимлигини таъкидлади.
Ўзбекистон ҳукумати раҳбари ўз нутқида икки давлатнинг божхона ва фитосанитар органлари томонидан «Агроэкспресс» мунтазам маршрут поездини йўлга қўйишни тезлаштириш зарурлигини қўшимча қилди.
Қайд этилишича, «яшил йўлак» тамойили асосида ҳаракатланувчи ушбу поездда қишлоқ хўжалиги маҳсулотларини етказиш муддати 5 кундан ортмайди.
Бундан аввал Ўзбекистон «Газпром»га газ сотувчидан сотиб олувчига айлангани ҳамда Россияда ноқонуний юрган мигрантларнинг қолиш муддати узайтирилгани ҳақида хабар берилганди.
Изоҳ (0)